ZALEN, Mar. 25, 2025: February, 2025 chhung khan Excise & Narcotics Department (END) leh Police Department chuan dan tlawhchhanin zu zuar 482 leh zu rui 82 an man.

Sawrkarin February thlaa Mizoram Liquor Prohibition Act, 2019 bawhchhia an man dinhmun a tar lanah zu zuar man zinga 441 hi END man niin police-in 41 an man bawk.

Zu rui man zinga 37 chu END man niin police-in 45 an man a. Rakzu litre 6,600.27 man niin heng zinga litre 4,964.17 hi END man niin police-in litre 1,636.1 an man thung a. Zu bilh lai pawh END-in tin 41,837 leh a chanve an man a. dawidim kg 14.3 an man bawk.

END hian February thla khan zu sakna bel 91 leh lirthei pariat an man a, police-in lirthei 12 an man ve bawk.

Dan leh thupek kengkawhtu chi hnih hian February thla chhungin a senchi (IMFL) ml 1,000 chu um 12, ml 750 um 3,046, ml 700 um 12, ml 375 um 283, ml 370 um 24 leh ml 180 um 225 an man a. Beer ml 650 um 68 leh canned beer ml 500 chi case 49 leh can 2,427 an man bawk.

END-in BEDC litre 194.8 leh police-in litre 361, a vaiin litre 555.8 man a ni a. END-in ram dang atanga lak luh zu um sarih, beer um li leh canned beer can 925 an man a, police-in ram dang atanga lak luh wine case 37 an man.