Aizawl February 18, 2024 : Mizoram Synod-in harsatna hrang hrangte pan tur leh an harsatnate chin felpui tura a din, Family Guidance & Counselling Centre (FG&CC) pantu zingah nupa kar buai an tam ber.

ZALEN-in FG&CC thawktute hnen atanga thu a dawn danin a pantu zawng zawng atanga chhutin nupa kar buai vanga pantu hi 28% vel an tling a. Nupa kar buaina chhan chi hrang hrang zingah sum leh pai chungchang te, sakhaw rin dan inang lo chungchang te leh ngaihzawng chungchang te chu a langsar zual a ni tih an sawi.

Nupa kar buaina dawtah hian ruihtheih thil vanga buaina chu pahnihna niin a dangte chu pawikhawihna chi hrang hrang, zirna chungchang, piantharna/thlarau lam nun te an ni tlangpui tih an sawi.

FG&CC thawktute chuan anmahni pantute hming leh nihna chu khawiah mah an puang zar ngai lo tih sawiin a ruk thei ang berin an harsatnate ngaithlain a sutkian dan tur an zawnpui thin niin an sawi a. An centre pantute chu an harsatna tawh dan azirin counselling leh tawngtaina nen hun an hmanpui thin tih an sawi a. Pantute chuan an hlawkpui thin hle nia an hriat thu an sawi bawk.

FG&CC thawktute chuan an centre pantute hlawkpui dan chu chi 2/3 te a nih avangin sawi thiam a har tih sawiin, “A then chu vawi khat lo kala thatpui nghal an awm laiin thenkhat chu vawi hnih vawi thum lo kal ngaite an awm a, an case azirin vawi eng emaw zat kalte pawh an awm bawk a. Kan centre hi mi tin hian an pan niin kan hria a, central service atanga 4th grade, piangthar tawh leh pianthar tumte mai bakah chhungkuaa lo kalte pawh an awm a ni,” an ti bawk.

Kum 1995 Synod Inkhawmpui chuan FG&CC din hi a rel a, January 21, 1997 khan Synod Conference Centre-ah bultan a ni a. Tunah hian Mission veng (headquarters) bakah Vaivakawn, Bawngkawn, Mamit, Serchhip, Champhai, Lunglei, Kolasib leh Khawzawl ah te centre hi kalpui mek a ni a. January, 2024 thleng khan centre pantu hi mi 60,129 an awm tawh a ni.