Fifa ranking tihchhuah hnuhnung ber leh Ningania tihchhuah inkarah India football mipa team-in result chhia leh tha a nei kawp a, rankinga an dinhmun erawh a danglam phah lo va. Blue Tigers hi Asia-a No. 18 a nih chhunzawm.

Fifa Rangkings (Men’s) tihchhuah tharah India team hi No. 102 niin a dinhmun ngai a luah a. Asia khawmualpui bikah pawh lehpeltu leh lehpelh a nei lo bawk.

Ranking hmasa leh tuna mi chhuah inkarah hian India hi vawi hnih an inkhel a. 2026 FIFA World Cup Qualifiers Round 2-ah khelh hmasak zawkah Kuwait tlawhin Igor Stimac-a team hian si khat faiin hnehna an chang haw.

A dawt leh chiahah erawh anmahni tantute hmaah result tha an nei zo lo va, World Cup thleng zo hlim, Qatar chu Odisha-ah mikhualin an tlawm. 

Result pahnih atang hian India hian tun thla chhungin point 1.96 an hmuh belh a, point 1200.8 an hmu ta a. An chung chiaha awm, Kosovo chu point 1.97-in an phak lo. 

Kumin chhunga India-in Fifa Ranking-a a tawn san lai ber chu July kha niin Intercontinental Cup leh SAFF Championship-a an champion hlim kha a ni a, tournament pahnihah hian final-ah Lebanon leh Kuwait a hneh.

September leh October-ah Lebanon leh Malaysia a hneh lo va, heng ram pahnih hi amah aia ranking-a hniam zawk an nih avangin an point hloh a tam phah a ni. 

Blue Tigers hmabak

India hi January-ah AFC Asian Cup khelin an feh chhuak leh dawn a, group stage-ah Australia, Uzbekistan leh Syria hmachhawn tur a nei dawn.

He tournament hi Blue Tigers tan eng ang dinhmun chiah nge an nih fiahna a ni dawn a, ranking-ah pawh an dinhmun an siam that theihna tur emaw, an hniam phah duai theihna tur emaw a ni bawk. 

Group stage-a a hmachhawn tur hi amah aia ranking-a sang zawk vek an ni a. A hnaih ber chu No. 91 Syria a ni a, Uzbekistan hi No. 68 niin Australia phei chu No. 25 daih a ni.