Commonwealth Youth Games-a gold medal lo la tawh, Lalruatfela chu September thlaa Commonwealth Senior, Junior & Youth Championships neih turah junior leh youth huanga India tana inlan turin a tling.

Bungzung tlangval, Mizo lifter hmabak êng tak nei, Ruatfela hi kg 89 huangah a inlan dawn a. Championship hi Suva, Fiji-ah September 17-21, 2024 chhungin neih a ni dawn a ni.

He inelnaa tel tura India aiawhtu turte thlanna (selection trial) hi June 30, 2024 khan Patiala, Punjab-ah neih a ni a, Ruatfela hi huang hniha tel tura thlan a ni ta a ni.

Ruatfela hian nikum khan Noida, Uttar Pradesh-a Commonwealth Youth Games neihah kg 81 huangah gold a lo la tawh a. Nikum vek khan Asian Youth Weightlifting Championships-ah palina a ni a. Nikum kum tir khan 5th Khelo Youth Games 2023, Madhya Pradesh-ah khan youth-ah silver medal a lo la a. North East Games 2022-ah leh Sub Junior National 2023-ah gold medal a la tawh bawk.

Hei mai a ni lo va, India Weightlifting Federation (IWLF)-in December 28, 2023 leh January 8, 2024 chhunga National Senior, Junior leh Youth Weightlifting Championships a buatsaihah youth championship-ah Mizoram tan silver medal a la bawk.

Mizoram leh India tihmingthatu ni fo tawh, Ruatfela hian kum 2019-ah Mizoram Weightlifting Academy zawmin April, 2022 khan National Centre of Excellence (NCOE), Patiala, Punjab-ah training turin an thlang a. Hma lam panin a kal zel a ni.