February 7, 2024; Traffic SP in thuchhuah siamin, nau paw chung a two wheeler khalh hmuh tur an awm fo tih tarlangin, fimkhur turin a ngen a, Car chung khuhna (sun roof) hawnga lirthei tlan laia naupang dak chhuak leh thu chhuak hmuh tur awm thin chungchangah pawh naupang himna ngai pawimawh turin a ngen.

Hemi chungchang hriattir Traffic SP in a chhuah a tarlan a nih danin, two wheeler khalhtu zingah hmeichhia an pung nasa a. Nu in an fate paw chung leh two wheeler (private & commercial) ah bawr tak taka school naupang phur hmuh tur an awm ta fo mai a, naupang phurh lai lo muthlu ta mai te pawh hmuh tur an awm fo thin. Heng avangte hian two wheeler khalhtute chu anmahni leh an mi phurhte himna ngaihtuah reng thin turin ngen an ni.

Tunlai Car chhuak thar thenkhatah a chung khuhna (sun roof) hawnga lirthei tlan laia naupang dak chhuak leh thu chhuak hmuh tur an awm ta fo bawk. Tlangram kawng zim/te leh kawi tak taka lirthei khalh kan nih avangin hetianga naupang an thu chhuak leh ding lawr mai thin hi a him lo hle a. Naupangte himna ngaihtuah a hetianga chuantir lo turin lirthei khalhtute ngen an ni bawk.

Naupang himna ngaihthah taka lirthei khalh hi The Motor Vehicles (Driving) Regulations, 2017 Regulation 5 (8)-in lirthei khalhtute mawhphurhna a duan bawhchhiatna a ni a, Section 177 of The MV (Amendment) Act, 2019 hmanga hrem theih a ni.