ZALEN August 18, 2025 : Chief Minister Lalduhoma chuan sawrkar hmasa hun laiin Finance Department hriatpui loh, phalna pawh lak chuan loh, work order pawh awm lova hnathawh a tam lutuk avangin Committed Liabilities-ah cheng vaibelchhe 100 chuang pek an ngaih phah a ti.

Vawiina ZPM chhung inkhawma thu a sawinaah Chief Minister Lalduhoma chuan, “Sawrkar hmasa hunlaia Finance department hriatpui miah loh a Committed Liabilities cheng vaibelchhe 100 chuang pek kan ngai. Finance Department hian sum hmanna lutchhuak an hre vek tur a ni. Heng ba pek tur hi Finance-ah allocation an dil lo a, Administrative Approval an la lova, Expenditure Sanction pawh an dil lova, work order pawh awm lova hnathawh a lo tam lutuk a. Chung ho chuan, ‘hei ka Bill’ tiin an rawn theh lut a, kan sawrkar hnua project thar atana sum kan dah te a ei hek a, chuvang chuan Department reng reng project thar atana sum kan ruahman hi commited liability atan hman kan rem ti tawh lo a ni."

Committed liabilty atan a hranpaa sum kan pe thei a nih chuan kan pe ang. Heng hi thil lo awm tawh dan a ni a, siamthat kan tum mek zel a, kawng chungchangah pawh la siam zawh loh theh darh ching te, a tha sa tichhiaa ZPM sawrkar tihmualpho tum te an awm a ni. Kum tam tak chhunga an lo tih theih loh kum 1 leh thla 8 chhunga felfai vek tura min beisei hi chu a dik bik lova. Opposition party-te pawh hian mipuiah insawi ba ngam ve rawh se, ‘Keini chuan heti hian kan ti ang,’ tih te hi sawi ve ngam se. Kan beisei chu Kalphung tharin hma kan hruai ang a, party dangin min rawl el se, a tha zawngin kan inel ang a, kan ram pawhin hma a sawn phah dawn kan lo ti a. Chutiang awm si lova insawichhiat ngawr ngawr hi thil dik a ni lem lo a ni,” a ti.