ZALEN March 24, 2025 : 15.3.2025 khan Mizoram Police te chuan heroin kaihhnawihah Ngaizel, Aizawl-a First Cry dawr neitupa Henry Lalbiakzinga Chhundeng chu a chennaah an man a, a thawhpui Laltluangzela chu an man tel bawk.

Police te hian a heroin kawlllai hawng 440 chu an man a, an thil man hi International rate chuan nuai 2,200 man hu nia chhut a ni a, Tualchhung rate chuan ₹1,41,66,000/ niin Mizoram police thuchhuah chuan a tarlang thung. Mizoram Police case no. Zokhawthar P/S No. 36/25 dated 14/3/25 u/s 21(c) /25/29 ND&PS Act 1985. ziahluh a ni.

March 13, 2025 zan khan Zokhawthar PS team New Hruaikawn Road-a mobile patrolling te chuan Bike pathum leh Champhai Taxi pakhat, MZ04B 0344 New Hruaikawn atanga Champhai pan mek te chu tidingin thu an zawt a. Hetia thil an zawh lai hian Taxi leh Bike pathum te hi thawklehkhatah chak takin Champhai lam panin an tlanchhe ta mai a. Police te hian um nghalin Taxi, Chhuansawmlala (18) s/o Paumuanthanga, Khuangphah khalh leh a mi phurh Vanlalhriata (21) s/o Lalpekruala, Zokhawthar, Taitesena Section te chu nangchingin man (apprehended) nghal an ni. Bike pathuma chuang, puitling pali leh kum tling lo pakhat te pawh a hnuah man an ni bawk.

Thu zawhfiahna atangin heng mite hian inthurualin a huhovin dan kalhin ruihhlo an tawlh ngei tih an inpuang a. Satha ip hring leh thawmhnaw ip dum chhungah heng ruihhlo hi dahin Taxi-ah hian an hlang ngei a, mahse Police duty an hmuh hnuah kawng thlangah an thehthlak thu an sawi. An inpuanna bawhzui hian March 14, 2025, 6:30 AM khan anmahni hruaiin an ruihhlo paih thlak hi zawn a ni a, Police duty-na hmun atanga 1.5 Km velah Heroin hawng 440 (Kg 4.722 a rit), tualchhung rate-a ₹1,41,66,000/- man hu man a ni ta a ni.

He thila inhnamhnawih mi paruk – 1). Chhuansawmlala(18) S/o Paumuanthanga, Khuangphah, Champhai Dist, 2). Vanlalhriata(21) S/o Lalpekruala, Zokhawthar, Taitesena Section, 3). Zothansanga (20) S/o Lalpekliana, Zokhawthar, Taitesena Section, 4). Lallianmawia (19) S/o Lalhmangaihthanga, Zokhawthar Khuangchera Section, 5). Lalmalsawma (21) S/o Chhunglawma, Zokhawthar, Neuva Section leh 6). Zomuansanga (18) S/o Rohlira, Bethel Veng, Champhai te chu dan angin man nghal an ni a, kum tling lo pakhat erawh JJB Champhai hnena hlan turin hren chhunzawm a ni. Zokhawthar PS Case No.36/25 Dt.14.03.2025 u/s 21(c)/25/29 ND&PS Act ziah luh a ni bawk.

He thil hi uluk taka chhui chhunzawm niin he ruihhlo tawlhruka inhnamhnawih mi pahnih - Henry Lalbiakzinga Chhundeng (34) s/o R. Malsawma, Dinthar, Aizawl leh Laltluangzela (28) s/o Lalrosanga, Zokhawthar te pawh Dt.15.3.2025 khan Aizawlah man an ni bawk.

He case hi uluk taka la chhui chhunzawm zel niin, he ruihhlo tawlh ruknaa inhnamhnawih dangte pawh chhui chhuaha man tumin ngawrh taka hma lak chhoh zel a ni.

Henry hi sumdawng hlawhtling tak niin Star Cement Platinum Winner 2022 pawh a la a, Mizo zinga he award ngaihhlut hlawh tak dawng hmasaber a ni.