ZALEN May 25, 2025: Power & Electricity Minister F. Rodingliana chuan, “Electric bill fixed charge thla khat dana kal thin chu daily angin a kal tawh dawn a. Ni danga chawi thlawn ang kha a awm tawh dawn lo a, hei hi mipuiin an hlawkpui tawh dawn a ni,” a ti.

Nimin khan a chenna inah chanchinbumite kawmin P&E Minister chuan smart meter vuah tan mek a ni tih sawiin, “Tunah hian eng emaw zat kan vuah tawh a, tun atanga thla ruk hnu velah chuan single phase-ah chuan vuah zawh hman vek kan tum a. Tunah hian Aizawl khawpui chhunga consumer 300 velah kan vuah tawh a, kan contractor-in nuai khat vel a nei tawh a ni,” a ti.

Minister chuan thla thar atangin electric bill pawt ru an awm leh awm loh an endik dawn tih sawiin, “Electric pawt ru te, a ruka heater hman te kan endik dawn a. Nikum khan hetiang pawh ruk vang hian vbc.107 kan hloh a, kan transformer atangin a hriat theih vek a ni,” a ti.

P&E minister chuan transformer lei belh an tum tih sawi bawkin, “Mizorama transformer 3,750 vel awmah a pawimawh zual 375 zinga 50 chuang kan thlak tawh a. Kuminah hian 10KVA chin 10 vel thlak leh kan tum a, hemi atan hian sawrkarin sum pawh a ruahman tawhin kumin chu power transformer lamah insawrbing kan tum dawn a ni,” a ti bawk.

Minister sawi danin nimin thleng kha chuan Mizoramin electric bill ba a nei lo a. Thla hnih chhungin bill pek that vangin rebate Rs. 9,41,000 an nei niin a sawi bawk.

P&E minister hi P&E Secretary K.Lalrinzuali leh P&E thawktu dangten an tawiawm a ni.