ZALEN June 17, 2025: Health Minister Lalrinpuii chuan vawiin khan a office chamber-ah May ni 30-a Nurse chawimawina sang ber National Florence Nightingale Award dawngtu V.Lalhmangaihi, Nursing Officer, Civil Hospital Aizawl hnenah Mizoram sawrkar aiawh chawimawina Citation leh tangka fai Rs.50,000/- a hlan.

Health Minister Lalrinpuii chuan,"India ram state hrang hrang mipui tam tak karah Mizo zinga Florence Nightingale Award hial la thei kan awm thin hi lawmawm ka ti a. A dawngtu V.Lalhmangaihi thawhrimna leh inpekna hi a entawn tlak tak zet a ni," tiin nursing care-ah hmasawn zel turin thawktute a chah nghal bawk. He hunah hian Mizoram atanga he award lo dawng tawhtute zinga Aizawl District-a awm mi panga te pawh sawm tel an ni bawk.

Award dawngtu V.Lalhmangaihi pawhin he lawmman dawng thei tura a tul anga buaipuitu Mizoram Nursing Council chungah lawmthu a sawi a. Tin, Mizoram sawrkarin Cabinet pawmpuina thlapa kumin atanga dan mumal tak siama lawmpuina citation leh cash award Rs 50000/- a hlan tel chu thinlung taka a lawmzia thu a sawi. 

National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 16 in he chawimawina hi an dawng tawh a. Kumin a dawngtu V Lalhmangaihi hi 17-na a ni. Mizo nurse, state pawna thawk pahnihin an dawng tawh bawk a ni.