American rock band Foo Fighters chuan an drummer ropui famta Taylor Hawkins hmun ruak luah turin Josh Freese an la lut. American drummer Josh Freese hian rimawi khawvelah sulhnu a hnutchhiah hnem tawh hle a, band pawhin an tangkaipui ngei a rinawm.

Foo Fighters hian an drummer ropui Taylor Hawkins hmun ruak luahtu tur hi an zawng a, 'Foo Fighters: Preparing Music for Concerts' livestream event-ah a hmunruak luahtu tur an zawn hmuh thu hi an puang a ni. Kum 50 mi Josh Freese hian - Nine Inch Nails, The Offspring, Sting leh Weezer leh band dang eng emaw zat a lo thawhpui tawh a ni. 

Foo Fighters ten kum 2022-a London khawpuia Taylor Hawkins tribute concert an buatsaih tum pawh khan an zingah a tel a,  Hawkins hman thin drum kit ngei a hmang nghe nghe a ni.

Foo Fighters hian kumtir lam khan band anga an chet chhuah leh tur thu an sawi a, rimawi chawlh san mai an la tum lo. April thla khan album thar an tihchhuah tur thu an puang leh a, thawm an rawn nei chho deuh mawlh mawlh. An album thar tur hi  'But Here We Are' tih a ni a, June 2 hian an tlangzarh dawn a ni. 

 Foo Fighters te hian May 24 atang khan summer tour an nei tan bawk a, New Hampshire-ah bul tanin khawpui hrang hrangah concert an nei dawn a ni.