Aizawl September 11, 2024 : Vawiin khan Environment, Forests & Climate Change Department chuan ramngaw leh nungcha te humhalhna kawnga nunna chan te hriatrengna ni ‘National Forest Martyrs Day’ chu State Forest Training Institute, Bethlehem Vengthlang-ah EF&CC Department Minister Lalthansanga leh AK Biswal, Principal Chief Conservator of Forests hovin an hmang.

He hunah hian EF&CC Department chuan an thawhpui an duty laia boral mi 12 – Lalzawmliana, Wildlife Guard, Dampa Tiger Reserve; Lalsiamliana, Forester, Durtlang; Lalnunzira, Forester, College Veng; R.L Zoliana, Tuikual South; Zatluanga, Wildlife Guard, Darngawn; K. Lallawmkima, Forest Guard, Kolasib; Laithansanga, Forest Guard, Khuruhlian; Vanlaltluanga, Deputy Ranger, Kawnpui; B. Rothangliana, Chowkidar, Aizawl Zoo; C. Lalrinkima, Forester, Lunglei; C. Lalengmawia, Forest Guard, Champhai te hriatrengna leh an mahni zahna chibai bukna hun hman a ni.

National Forest Martyrs Day hi 2013 atang khan September ni 11-ah India ramah hman tan a ni a, September ni 11 hi kum 1730-a Bishnoi hnam mi 363 ten ramngaw an humhalh avanga an lal kuta an thih ni a ni a, hemi hriatreng nan hian September ni 11 hi National Forest Martyrs Day atan kum tin hman thin a ni.