Pathianni zana Roland Garros-a a champion leh hnuah Novak Djokovic chuan kum 20 dawn a lo elpui tawh, Rafael Nadal khumin mipa maltanah Grand Slam nomawi la hnem ber a ni ta a, a lawmpui hmasa ber zinga mi chu a elpui hi a ni thung.

Khelmualah inelin inbei nasa mah se Spaniard Nadal leh Serbian pa inkar a chhe chuang lo va, thianghlim taka inelin tennis fan-te hmaah hmuhnawm an chhawp chhuak thin.

Djokovic-a hian French Open final-ah hian Norwegian tlangval, Casper Ruud chu 7-6 (7-1) 6-3 7-5 a hnehin a vawi thum nan a champion a, Grand Slam nomawi a lak vawi 23-na niin Nadal-a’n 22 an lak tawh a lehpel.

A elpuiin amah a khum fel chiah hian hliam avanga inlan ve thei lo, Nadal-a chuan Twitter-ah a lawmpui thu a tar lang nghal a, lawmpuitu hmasa ber zinga mi a ni.

“@DjokerNole, i hlawhtlinna ropui tak hi ka lawmpui tak zet che.

“Kum tam pawh la liam lovah kha chuan 23 kha ngaihtuahnaa awm phak loh number kha a ni a, tunah erawh chuan i puitlin ta! 

“I hlawhtlinna hi i chhungte leh i team-in hlim takin lawm rawh u!” tiin a lawmpui rualin duhsakna a hlan.

Nadal-Djokovic inelna (rivalry) hi player, coach leh pundit tam takin tennis chanchina inelna ropui ber (greatest rivalry) ti hialin an sawi thin a. 2006 French Open quarterfinal-a an inhmachhawn tuma Djokovic-a inhliam avanga a khelh tluan theih loh avanga Nadal a tlang tum atang khan a intan.

Hemi hnu atang hi chuan kum tin vawi khat tal an la inhmachhawn ziah a, kum 2006 atang chauhva inelna intan ni mah se ATP Tour chuan kum 2000 chhova inelna ropui pathumnaah a dah phak hial nghal a ni.

Tun thlengin Grand Slam final-a an inhmachhawn tawh vawi li nen vawi 59 an intum tawh a, Djokovic hian 30–29 in hma a hruai a. Inelna hrang hranga final-a an inhmachhawn tawhah pawh Serbian pa hian 15–13 in hma a hruai bawk.

Hetih lai hian Grand Slam bika an inhmachhawn tawhah erawh Nadal hian 11–7 in hma a hruai ve thung a. French Open-ah pawh Nadal hi 8–2 in a chungnung zawk a, US Open-ah 2–1 in hma a hruai bawk.

Grand Slam dang pahnih, Australian Open leh Wimbledon-ah erawh Serbian chungnungin Melbourne khawpuia inelnaah 2–0 leh All England Club intihsiaknaah 2–1 in hma a hruai.

An inhmachhawn tawha vawi 27 hi hard court-ah niin Djokovic hian 20–7 in hma a hruai a. Spanish hman thiam, clay-ah erawh Nadal chungnungin 20–8 in a sang, grass-ah erawh 2–2 in chak tam zawk an la awm lo.

Grand Slam nomawi lakah pawh Djokovic hian hma a hruai ta a, vawi 23 a lak zinga 10 hi Australian Open, French Open vawi thum, Wimbledon vawi sarih leh US Open-ah vawi thum a champion ta a. Nadal-a hi Australian Open-ah vawi hnih, French Open-ah vawi 14, Wimbledon-ah vawi hnih leh US Open-ah vawi li champion tawhin nomawi 22 a la tawh.

Djokovic-ah hian Grand Slam maltana champion tamah Serena Williams a umphak ta chiah bawk a, a chungah hian hmeichhia tho, Margareth Court a la awm a, ani hian vawi 24 a la tawh a. Thla tharah London-ah Wimbledon khelh a ni dawn a, tluk turin hun tha tak a nei nia ngaih a ni.