Rafael Nadal chuan harsa takin round of 16-ah a khingpui Felix Auger-Aliassime chu set nga khelh puiin 3-6 6-3 6-2 3-6 6-3 a hneh hramin quarter final a lut a, ti hian hun rei tak atanga a elpui lian ber seeded pakhatna Novak Djokovic-a nen French Open quarter-final-ah an inhmachhawn ang.

Kum 35 mi Nadal hian harsa taka a khingpui a hneh theih hram laiin, quarter-final-a a hmachhawn tur Djokovic erawh chuan a khingpui seeded 15-na Diego Schwartman chu awlsam angreng takin 6-1 6-3 6-3 in a hneh thung. Mipa singles-ah hian Carlos Alcaraz leh Alexander Zverev te pawhin straight-set-a an khingpui hneh ve ve-in last eight an lut ve bawk. 

Seeded parukna Alcaraz, kum 19 hian a khingpui Karen Khachanov chu 6-1 6-4 6-4 in a hneh a, seed pathumna Zverev thung hian 7-6 (13-11) 7-5 6-3 in qualifier atanga tling Bernabe Zapata Miralles a hneh thung.

French Open-a mipui en chak ber pakhat chu Nadal leh Djokovic inhmachhawn tur hi a nih a rinawm a, anni pahnih hi tum 58 inhmachhawn tawhin Djokovic hian tum 30 hnehna chang tawhin Nadal hian vawi 28 a hneh tawh thung. Final match bikah tum 28 an intawng tawh a, Djokovic hi tum 15 zet a chak zawk tawh bawk. Mahse, tournament lian thamah erawh Nadal hi chetha zawkin 10-7 in hma a hruai thung. 
  
Seeded pangana Nadal hian Auger-Aliassime a hmachhawn hi French Open bika a match 112 khelhna chiah a nih bakah a chak 109-na a ni bawk. Record a nei tha rem rem khawp mai. Roland Garros-a tum 13 zet champion tawh Nadal hi kum 21 mi Auger-Aliassime lakah hian a tlawm teuh hle a, Court Philippe Chatrier tualah quater lut tur hian set nga zet an innuai a ni. Tun tum hi Paris clay bika Nadal-a'n deciding a khelh tum thumna chiah a la ni a, 4-3 a hma a hruai laiin break point vawi hnih a lain 6-3 in a chak zui thei a ni. 

Nadal chuan,"He chakna hi ka tan a pawimawh tak zet zet a ni," a ti. Roland Garros-a hian Nadal hi fourth round hnu lamah a la tla ngai lo bawk. An inkhelh chungchang sawiin Nadal chuan,"Bul ka tan tha lo khawp mai a, break theihna hun tha tam tak ka hloh bawk. Mahse chak zawkah ka tang hlauh a, match lehah chuan tun ai hian ka khel tha thei zawkin ka ring," a ti.