Aizawl : Frontline worker, damdawiin lam thawktu leh vengtu lam ten midang laka covid-19 an thehdarh hnuah pawh sawrkar lam chuan thawktute tana kaihhruaina, Standard Operating Procedure (SOP) an la nei lo niin ZALEN chuan thu a dawng. hetihlai hian he hri leng venna kawnga thawhhlawk tak tualchhung himna atana thawk Local/Village Level Task Force atanga hri kai an awm nual tawh bawk.

Health Secretary, H. Lalengmawia, IAS chuan frontliner te tan hian a hranpa in SOP siam a nih loh thu leh Covid-19 hri leng avanga mi tin tana siam SOP chu mitin tana hman mai tur a ni tih a sawi. Chutih rualin, frontline worker te hi midanga thehdarhtu an nih leh nih loh sawi theih a nih loh thu a sawi tel bawk.

Tun hnaia hri leng an pung chak em avangin Partial Lockdown chu Aizawl Municipal huamchhungah puan leh a ni a, hemi chhung hian a tam thei ang ber swab sample lak turin hmalak mek a ni. Veng tam tak chuan partial lockdown puan a nih hma hauhin an veng dinhmun avangin lockdown an veng chhungah an puang a, an tualchhunga positive ten an tlawh dawr leh hmun tlawhtute an chhui mek hlawm.