Aizawl:  Food Civil Supplies & Consumer Affairs Minister K.Lalrinliana chuan, "Inkal pawhna kawngin duhthu a sam lohna hmunah te fur laia buhfai leh ration mamawh tur chhek khawl vek a ni," a ti.

Zirtawpni kalta khan Lawngtlaia Food Civil Supplies & Consumer Affairs Department building thar pahnih, Principal Distribution Centre (PDC) Godown leh Legal Metrology Working Standard Laboratory a hawnna ah he thu hi sawiin Minister chuan FCS&CA Department hnuaiah Central Sector Scheme (CSS), 2017-20 atangin Mizoram hmun hrang hrang hmun 10-ah Rs nuai 1,922 sengin intermediate storage godown sak a nih thu leh Lawngtlai PDC Godown pawh he'ng zinga mi hi a nih thu sawiin, "Buhfai mamawh chhek khawlna kawnga harsatna awm thei tam tak chu hei hian a sut kian beisei a ni," a ti. Minister chuan FCS&CA Department hnuaia peng pakhat, Legal Metrology chu mipuiin ei leh bar leh ni tin khawsakna atana an mamawh leh hmanraw hrang hrangte tha tak leh buk tling ngei an hmuh theih nan a pawimawhzia sawiin, sawrkar pawhin ngai pawimawhin a thuam chak chho zel tih a sawi a. Consumer-te dikna humhalh a nih zel theih nan Consumer Forum thuam chak kawngah pawh sawrkarin hma a la mek tih a sawi bawk.

Lawngtlai PDC Godown hi a dung 150 ft leh a vang 35 ft-a zau niin, buhfai metric tonne 1,000 dah theihna tur a ni a. A sak hna hi Babie Construction & Consultancy Services (BCCS) te'n thawkin, ni 19.10.2019 leh ni 25.9.2020 inkar chhungin an sa a. Rs. 2,00,44,000/- senga sak a ni. Legal Metrology Working Standard Laboratory hi 'Strengthening of Legal Metrology Infrastructure of States & UTs' scheme kal tlanga sum hmuh, Grant in Aid Rs nuai 50 hmanga sak a ni a. A sak hna hi Mizoram Technocrats Company (P) Ltd te'n thawkin, ni 01.06.2016 - 28.02.2017 inkar chhungin sak a ni a. A zau zawng hi square metre 120 niin, room pahnih leh bathroom pathum a awm a ni.