ZALEN June 15, 2025: Kum liam ta, 2024 chhung khan Mizoramah ruahtui tla a tam hle a, Aizawl bika ruahtui tla chu mm (millimetre) 2,295.9 a tling a. Hetihlai hian tun thla nga kalta chin a ruah tla zat chu nikum January - May-a tla zat aiin a tam tawh zawk.

Directorate of Science & Technology atanga ZALEN thudawn danin, kumin thla nga (January - May)-a Aizawla ruahtui tla zat chu mm 750.4 a tling a, hei hi nikum January - May-a tla, mm 656.8 aiin a tam zawk.

Kumin January leh February-ah ruahtui tla a awm lo a, March-ah mm 1.8 tlain, April-ah mm 128.6 leh May-ah mm 620 a tla.

Hetihlai hian nikum January-ah ruahtui mm 1.8 a tla a, February-ah mm 15.2, March-ah mm 33.8, April-ah mm 87.0, May-ah mm 519 a tla. June-ah mm 353.7, July-ah mm 35.5, August-ah mm 572.7, September-ah mm 231.6, October-ah mm 82.9, November-ah mm 20.2 leh December-ah mm 19.6 ruahtui a tla.

Nikuma ruahtui tlak tam ber ni chu May 28 niin mm 205.0 a tla a, hetiang zata tam hi ni khat thil thu-ah ruah a tla zen zen lo va. Kumin thla nga kal ta chhunga ruahtui tlak tam ber ni chu May 31 niin mm 139.8 a tla thung.

State Meteorological Centre, Directorate of Science & Technology-in a chhinchhiah tawh chinah Mizoramah kum 36 chhung (1986 atanga 2021) khan fur laiin (June - September) kum tin ruah mm 1,289.9 sur ang a ni.

Kum 2017 kha fur chhung bika ruahtui tlak tam ber kum niin June - September thla chhungin mm 1,836.0 a tla a. Kum 2020 kha fur chhung bika ruah tui tlak tlem ber kum a ni a, mm 856.4 chauh ruah a tla.