Aizawl: FCS&CA Minister K.Lalrinliana chuan, "Kolasib khaw chhung hmun engemaw zah ah Futsal ground siam tur  leh Semi indoor Volleyball court sa turin hmalak thuai tum a ni," a ti.

Nimina Hmar veng, Kolasib-ah North Kolasib Games & Sports Association Semi Indoor Basketball Court, Gallery leh Volleyball Court a hawnna ah he thu hi sawiin Minister chuan infiamna hmunhma te chu neitu nihna pu chunga uluk leh țangkai tak a hmang turin a chah. Minister chuan Kolasib khaw chhungah khelmual țha leh changtlung tak tak a awm thu sawiin heng hmunhma te hi Kolasib țhalaiten an thiamna leh theihna an tihpunna hmun a hmang turin a chah a. Khawtlang hmasawn tur chuan a chhung a cheng te an hrisel hmasak a pawimawh thu sawiin infiamna chu taksa tihrisel tu leh nun vawngtu hmanraw pawimawh tak a nih angin infiamna chu uar zel turin kalkhawmte a chah bawk a ni.

John LT Sanga, Deputy Commissioner chuan Kolasib țhalai ten infiamna hrang hrangah din chhuahpui tham theihna an neih thu tarlangin heng theihna te hi eizawnna tlak, ram leh hnam tihmingțhatu ah hmang turin a chah.

Lalnunsanga, Marvin's Construction tarlan danin April ni 17, 2022 khan Semi Indoor Basketball court hi sak țan a ni a. Feet 101 a sei, feet 61 a zau leh a chung feet 25 a sang niin nuai 46 vel seng a sak a ni. Semi Indoor Basketball court hawnna ah hian C.Lalengkima, Secretary, NKGSA in report a pe a,  Laltlankima, President, Village Council, Hmar veng in thu sawiin F.Zothankima, Vice President, NKGSA in lawmthu sawina hun a hmang a. Kolasib distrcit atanga North East Olympic 2022 a lawmman la te chawimawina hun hman a ni bawk a ni.