ZALEN May 23, 2025; Gas metric ton MT) 900 dah theih na tura buatsaih thar leh mek Mualkhang gas bottling plant chu kum 2027 kum tawp lama hawn theih tura peihfel hman beisei a ni.

Gas MT 900 dah theih na tura buatsaih mek Mualkhang gas bottling plant hi vawiin khan supply minister B Lalchhanzova'n a tlawh a, Bialtu MLA K Laldawngliana leh dept. official ten an țawiawm bawk a. Chhawr tangkai a nih thuai theihna turin sawrkarin theihtawp a chhuah tih supply minister chuan sawiin, clearance tul zawng zawng pawh an tifel tawh tih a sawi. 

Mualkhang gas bottling plant-a Divisional General Manager Z. Lhungdim-a'n a sawi danin, Mualkhang gas botlting plant buatsaihna hmun hi hectare 5.96 a zau niin, ruahman danah chuan ni khatah eirawngbawlna gas bur (cylinder) 7500 vel a siam chhuak thei dawn a. A hma khan ni khatah gas bur (cylinder) 2500 vel siam a ni thin niin a sawi.

Mualkhang gas bottling plant hi kum 2006-ah commission niin, engemawchen hman a nih hnu ah December 2019 ah enfiah a ni a. Gas dahna (bullet) te a him tawk tawh loh avangin January ni 16, 2020 ah khar a ni ta a. A aia lian leh changtlung zawka din thar leh tura hmalak mek a ni ta a ni.

#ZalenNews