DOWNLOAD OUR APP

Read latest news on your phone
app-store
Gas home delivery College Veng-ah kalpui zel, veng thlan bik 11-ah gas agent te tan turin ti tawh
Oct 27, 2019

Aizawl: Food, Civil Supply & Consumer Affairs department hmalaknain Aizawl khawpui chhunga gas agent/distributor te chuan gas home delivery kalpui turin hma an la mek a, pilot project kalpui mek a nih bakah gas agent 11-te chu hma la tura hriattir an ni tawh.

Gas home delivery hi Mizofed chuan September thla tir khan enchhinna pilot project angin College venga chhungkaw thlanbik 70 ah an kalpui a. Tunah hian Aizawl khawpui chhunga gas agent 11-te chu an huam chhunga veng thlan bik pakhat theuh neiin home delivery hi kalpui turin FCS&CA department chuan an ti a.

Ruahman dan chuan Biakkungi Gas in Aizawl Venglai, Vanbuangi Gas in Tuikhuahtlang, V.Neihkunga Gas-in Bawngkawn, Caravan Gas-in Zemabawk, Suak-chhunga Gas-in Zawrkawt/Dawrpui, Kapliana Gas-in Melthum, Zopuii Gas-in Vaivakawn, M&B Gas-in Khatla, Zothan Indane-in Zonuam, Zoram Indane-in Chaltlangah te an kalpui dawn a ni.

Zalen palai zawhna chhangin FCS&CA thawktute chuan gas home delivery chungchangah hian tun laiin veng hrang hrangah awareness campaign neih mek a ni a. Home delivery kalphung, mobile phone atanga gas book dan (Interactive Voice Response System = IVRS) bakah tul dang inzirtirna atan hman mek a ni a. Tuna thlan bik vengah te kalpui a nih zawhah a tahtawlin veng hrang hrangah kalpui chhunzawm tum a ni tih an sawi.

Tum khata home delivery kalpui vak chu mipui tan inzirna hun a awm tlem theih dawn avangin veng thlan bikah hmalak phawt tha zawka an hriat avangin hetiang hian an kalpui hrih niin an sawi a ni.

Zalen zawhna chhangin FCS&CA thawktu te chuan gas home delivery man atan Rs. 70 ruahman chhin a ni tih an sawi a, tuna home delivery rate chu thla khat hnuah ennawn leh a ni dawn tih sawiin Mizofed-in College venga chhungkaw 70 tan enchhinna a lo kalpui tawhah home delivery rate bur 1 pek man Rs.90 chu an chawibelh a, hei hi a chhan chu gas book tu ten an book hun a inan loh avanga two wheeler hmang tea pek a ngaih thin vang tih an sawi a. Tunah chuan veng thlan bikah a hlawma an pek theih dawn avangin Rs.70 chu awm tawk velah an ngai hrih a ni. Gas chu book atanga ni 4/5 hnuah a thleng thin niin an sawi bawk.

Mizorama gas a harsat chhan chu puja vanga thawktu tam tak an chawlh avang te, puja lai chuan vairamah mamawh a tam avanga an pek tam zawk vang te, Mualkhang-ah gas siam chhuah tihtlem a nih avang leh a phurh man a tlawm avanga phurtu an awm that loh vang te niin FCS&CA thawktute chuan Zalen palai an hrilh bawk.

Mizorama LPG Regular Distributor hi khawpuiah 23 awmin RGGLV Distributor, thingtlang lama pe tu 29 an awm mek a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh