Aizawl August 9, 2022: Food Civil Supply & Consumer Affairs (FCS&CA) Department chuan LPG Subsidy lut lo avanga harsatna awm leh subsidy rate a gas lak theih zat consumer te hriattirna a tichhuak a, kum khat atana mi pakhat hmingin gas bur 12 bak a lak theih loh. 

LPG subsidy chungchang hi IOCL emaw, LPG Distributor-te emaw thuneihna a nih loh thu an sawi a, India-a LPG subsidy buaipuitute chu National Payment Corporation of India (NPCI) niin Ministry of Petroleum & Natural Gas hnuaia he hna thawk tura Central Sawrkarin a thlan an ni, an ti a. Heng harsatna Mizoram mipui tam takin a tawh mek hi FCS&CA department chuan ziakin an thlen tawh tih thuchhuah an siam-ah an tarlang.

FCS&CA chuan mipui lam pawhin subsidy tha taka an hmuh theihnan phone No., LPG connection leh kan Aadhaar No., te bank account te nen a in link tha turin a hriattir a, hetiang a nih loh chuan subsidy hi a lut thei lo, an ti. Gas connection neihna distributor-ah KYC hmangin document te hi kan update thin tur a ni, tiin, Bank Account a che reng (active) tur a ni a, Bank lamah enfiah fo a tul an ti bawk. Subsidy hi mi pakhatin kumkhat chhungin cylinder 12 (sawmpahnih) atan chauh dawn theih a nih thu an tarlang bawk..