Aizawl: Thlaleh ni 4 atanga service tura ngaih Go Air chuan October ni 10,2019 atang hian service tan an tum a, airlines dang te erawh an service tan hun tur hriat a la ni lo.

Zalen-in Aviation thawktute hnen atanga thu a dawn danin Go Air hi chuan Aizawl-Guwahati-Kolkata service tir hi an tum chiang tawh a, naktuk Thawhtanni hian company mi leh sa 6 te Aizawl ah lo kalin tihfel an tum. Go Air hian ticket pawh an hralhchhuak tan tawh a ni.

Zalen palaiin airline travels pakhat a biakna ah chuan Go Air hian October ni 15,2019 atangin service an tum niin an sawi a, ticket pawh October ni 15 atanga 26 chhung chu a book theih tawh niin an sawi bawk.

Hetih lai hian airline service tura beisei Indigo chuan an service dawn leh dawn loh an la ti chiang lo a, tunkar chhung hian an hotute Aizawl ah lo kalin office, check-in counter leh thil pawimawh dang te rawn enfiah an tum. Indigo hi chuan Aizawl-Kolkata inkar chauh service an tum a ni.

ATR 72 service tir tura beisei Alliance Air erawh chuan boruak thar an neih lem loh avangin an service dawn em tih a la chiang lo a, an service ai chuan service loh a rinawm zawk niin Aviation thawktute chuan an sawi a. Alliance Air chu Air India peng a ni a, Air India chu sum lama tlakchhiat em avangin service an tum hi an thulh leh a rinawm zawk mah niin Zalen an hrilh bawk.