ZALEN March 2, 2025 : Mizorama oil palm leitu Godrej Agrovet Ltd. chuan Kolasib district-ah ‘oil palm refinery’ din tumin hma an la mek.

Zirtawpni khan Kolasib KVK conference hall-ah Scientific Advisory Committee (SAC) neih a ni a, KVK hmalakna hrang hrang leh hmachhawpte thlirin sawi ho a ni a. Hemi rual hian Kolasib district-a oil palm hmalakna zirchian nghal a ni bawk.

Agriculture Jt. Director Lalringliana chuan environment tih chhiat hlauh vanga Mizoram oil palm mi thenkhatin an hlauhthawn leh vei chu khawvelin vei thamah a ngai lo tih a sawi a.

Mizoramah oil palm chin nan ramngaw thiah a awm lo tih a sawi bawk a, Mizoram chu hmarchhaka oil palm seed garden nei awm chhun a nih thu leh kum thar atangin state pawnah oilpalm seedling hralhna atangin state sawrkarin kum tin sum tam tak a la lut thei dawn tih a sawi.

Godrej Agrovet Ltd-a Sr. Executive Lalruatkima chuan Mizorama oil palm hmalak dan leh hmachhawp hrang hrang a tar lang a. Farmer-te thar chhuah (production) a san theih nan Mamit leh Kolasib district-ah ‘One Stop Solution’ an siam mek thu leh oil palm tharte thlitfimna turin Godrej Agrovet Ltd. in Kolasib district-ah ‘Oilpalm Refinery’ a din dawn tih a sawi bawk.