ZALEN September 6, 2023 : Mizoram sawrkar chuan Golden Card neisa te bakah ration card hring leh card eng nei te tan Golden Card siamna hun an hawng dawn a, Central lam pawhin hei hi a thu chuan an phalsak tawh a, hemi atan hian hma lak mek a ni. Mizoram State Health Care Scheme leh Central health care scheme, AB-PMJAY thlunzawm an tum bawk.

Golden card siam tur hian card a hming chuang te hming zawng zawng dahluhna tur software chu tunah hian buaipui mek a ni a, hemi bawhzui nan hian October 14 hian health Department chuan training an ko a, an hospital zawng zawng, PHC thlengin mahni bial theuhah card hring leh card eng nei ten Golden Card an neih theih nan hma an la anga, kuminah chuan Mizoram tuamchhuah hman an tum a ni.

Mizoram State Health Care Scheme (MSHCS) hi Asian Development Bank nen Vaibelchhe sangkhat loan la turin an indawr mek a, hmawr an bawk hnai tawh niin Health Department lam chuan an sawi a, September thla chhung hian inremna ziah theih pawh an beisei.

Chutihrualin ADB lam hian tih tur an tuk a, MSHCS chu universal health coverage a ni tur a ni an ti a, mi zawng zawng he scheme hian a thleng pha tur leh engtik lai pawha mi zawng zawngin an hman tangkai theih tur a ni an ti a, hei hi Mizoram sawrkar pawhin a pawm tawh an ti.

Health Department lam chuan Central health care Scheme kum khata nuai nga thleng bill theihna AB-PMJAY leh nuai hnih bill theihna MSHCS kalphung inang lo lutuk chu siamrem turin central lamin an nawr niin a sawi a, ADB atanga sum hmuh tur te hmuh a nih hunah chuan health care scheme chi hnih nei tawh lovin health care scheme pakhat chauh neih a ni tawh ang an ti a, cheng nuai 5 thleng bill theih a nih tur thu an sawi a, mipui tan a chhenfakawm dawn a ni, an ti. 

Tun thla hian ADB hotute pawh rawn zin an tum thu leh a hmawr pawh an bawk mai theih an rin thu an sawi a, vawi lehkhata tih nghal rum rum theih a nih loh tur thu an sawi tel bawk.

Golden card hi tunah hian sawrkar damdawiin bakah Adventist Hospital, Nazareth Hospital leh Eye Care centre-ah te a hman theih mek a, hospital dangah erawh hman theih a la ni lo. Golden card hian rate hran a neih avangin private hospital te hian an pawm lo tih an sawi a, health care scheme thar hman a nih chuan a rate pawh tihsan an tum a, Dawmdawiin lian ten an pawm theih ngei turin siam an tum thu an sawi bawk a ni.