Aizawl August 18, 2024 : Nimin khan tlawmngai pawl hrang hrang intelkhawm, NGO Coordination Committee (NGOCC) hruaitute chuan Central YMA Office-ah chanchinbumite kawmin Gorkhali-te Other Backward Class (OBC)-a dah an duh loh thu leh Lengpui Airport chu Indian Air Force (IAF) kuta hlan an duh loh thu an sawi nawn a. NGOCC Chairman Lalhmachhuana chuan, “A pawi hmaa inven mai hi a him a ni,” a ti.

NGOCC chairman chuan, “January 26, 1950 atanga Mizorama cheng Gorkhali hi mi 7,687 an awm mek a. Tuna Gorkhali-ten OBC-a puang tura sawrkar an nawr hi tha kan ti lo a. Central sawrkar hnuaiah chauh hna hauhsak an beisei nia sawi hi a khingbai a, nakin lawkah chuan state-ah an beisei leh ngei dawn a. Chuvangin, kal tlangpui lo turin sawrkar kan ngen a ni,” a ti.

IAF kuta Lengpui Airport hlan pawh Mizoram tan a tha lo tih sawiin, “Duh thala mipuiten kan hman theih reng hi kan duh dan a ni a. Kan kuta a awm hian him tlangah kan ngai a ni,” a ti.

NGOCC Secretary Prof. Malsawmliana chuan Lengpui Airport chu IAF kuta hlan a nih chuan mipui tan harsatna hrang hrang a awm thei dawn tih sawiin, “IAF kutah awm ta se harsatna hrang hrang a thleng dawn a. Chung zingah chuan airport leh a chhehvel hi restricted area a ni nghal dawn a, mipui tan harsatna a thlen nghal dawn tihna a ni a. Chubakah IAF hian flight schedule an siam a ngai dawn a, khualzin phur thlawhna ai chuan anmahni thlawhna an ngai pawimawh ngei dawn a. Flight cancel a tam dawn bakah additional flight a har tawh dawn a. Chu mai bakah India ram hmun danga IAF enkawl airport-te hian hma an sawn lem lo a. Sipaiin an enkawl tawh chuan um chhuah leh an har dawn,” a ti.

Gorkhali-te OBC pek chungchang sawi bawkin Prof. Malsawmliana chuan, “State danga OBC-ten quota an neihah hian central leh state-ah an nei kawp zel a. Gorkhali-te hian central-ah chauh kan dil dawn ti mah se nakin lawkah chuan state-ah an la dil hi kan ring tlat a. Keini aia mihring chen tamna zawk leh Gorkhali tamna zawk - Meghalaya, Nagaland leh Arunachal Pradesh te pawhin an pe lo a. Tribal state-a hnam dang quota lo pek leh chhawn hi a him tawk loah kan ngai a ni,” a ti bawk.