Aizawl July 21, 2023: Governor, Dr Hari Babu Kambhampati chuan Pachhunga University College-ah Freshers’ Social leh Felicitation programme chu vawiin khan khuallian niin a hmanpui a, zirlai 914 in final semester examination an hmachhawn a, chung zinga zirlai 822 chuan pass in, pass percentage hi 89.93 a ni.

Governor Dr Hari Babu Kambhampati chuan thuhmahruaiah NIRF Ranked 34th college Pachhunga University chu an hlawhtlinnaah lawmpuiin tunah chuan India Hmarchhaka College tha berah chhal theih an ni mek a ti. Zirlai lutthar te chu College tha takah an luh theih avanga lawmpuiin, tum nei a, an thil tum tihlawhtling tura suangtuahna nung nei turin a fuih a. Zirlai chhuak te leh chawimawina dawngtute chu hmabak eng tak an nei, a ti a, Mizoram leh India tana tih theih an neih thu te a hrilh bawk a ni.

He hunah hian MZU undergraduate examination 2023 a Department tina top 10 ni pha te chu chawimawina certificate leh pawisa fai hlanna hun hman a ni a. Stream hrang hranga ti tha te hnenah “Proficiency Award” hlan a ni.

1. Lenrual Hlui Award (topper in science stream): Jeffrey Vanlaltlana, Department of Biotechnology
2. Khawtinkhuma Award (topper in Commerce stream): Lalrinzuali, Department of Commerce
3. HK Bawichhuaka Award (topper in Arts stream): Lalduhsaki, Department of History
4. A. Sawihlira Award (topper in Management stream): Esther Zonunsangi, Department of Management
5. Dr H. Lallungmuana Award (Institution topper): Jeffrey Vanlaltlana, Department of Biotechnology

Session liam taah Zirlai titha ber – student of the year award chu C.Biakthansanga in Governor hnen atangin a dawng.

Kumin hian PUC atangin UG stream hrang hrangah mi 914 in final semester examination an hmachhawn a, chung zinga zirlai 822 chuan pass in, pass percentage hi 89.93 a ni. Department hrang hrangah rank holder (top 10 a lang thei) mi 152 an awm a. MZU hnuai a rank holder ni thei percentage hi 59.84 a ni bawk.

Department 16 atangin pakhatna ni thei (topper) mi 16, PUC hian a nei a. He hlawhlinna hi MZU hnuai a topper ni theiawm zat atanga chhutin 59.25% lai a ni bawk.

PUC-ah hian UG course 23 leh PG course 5 a zir theih a. Zirlai hi 3227 an ni a. Kuminah zirlai lutthar 935 awm tawhin, CUET hmanga lut te tan pawh admission tih mek zel a ni bawk.