Aizawl June 10, 2023 : Governor Dr. Hari Babu Kambhampati chuan vawiin khan Tennis Court bulhnaia thei leh thlai zuartute a kawm a; an sumdawnna kalpui dante enpuiin hlawk zawka an kalpui theih nan an mamawhte a sawipui a ni. He hunah hian sumdawngte mamawh thurawn leh bank loan chungchanga hriattur pawimawhte lo hrilh hre zel turin Bank hotute pawh an tel a ni.

Governor leh thei leh thlai zuartute chuan inkawmhona hlimawm tak an nei a. Governor chuan sumdawngte chu Sawrkar laipuia scheme te leh street vendor te hmasawn nana loan puk theihte chu hrilhhriain, social security scheme hrang hrang, mi harsa ber tan pawha harsa lo te a inziahluh theihte chu zawm ve theuh turin a fuih hlawm a. Vawiina an thil zir leh hriat thar te chu an thian dang te hrilh chhawng turin a chah bawk a ni.

Thlai zuartute kawmna hun hi Governor leh Bank hotute hian an inkawmna hrang hrangah an lo sawi ho tawh a. Sumdawngte hmakhua ngaiin Sawrkar laipuiin loan chi hrang hrang (MUDRA , SVANIDHI) leh social security schemes (PMJDY, PMSBY, PMJJBY) a tihchhuah te chu nasa zawka mipui te zingah awareness pek a nih theih nan an lo sawi ho tawh thin a ni.