Aizawl May 30, 2023: Governor Dr Hari Babu Kambhampati chuan vawiin khan Tualchhung Chanchinbu chhuahtu thenkhat te a kawm a. Mizoram tana thil pawimawh nia a hriat te a titi puiin Media lam ngaihdan leh an ngaih pawimawh te pawh a zawt bawk a. Hemi hnu hian Governor chuan a inleng te hi chawchhun a kil pui a ni.

Governor Dr Hari Babu Kambhampati chuan Print Media Publisher te kawmnaah hian a hna pawimawh ber chu, Mizoram Sawrkar leh Central Sawrkar inkar ah thawk palai, Central a nawr tul apiang te nawr a, state mamawh state official ten an thehluh te umzui bakah a tul anga State tana theihtawp chhuah a ni a ti a. Mizoramah hmasawnna atan Media ten hna pawimawh tak an thawk nia a hriat thu sawiin theih tawp chhuah chhunzawm turin a chah a ni.

Governor leh Media Publisher te inkawmnaah hian thupui neih lawk bik a awm lo a. Mizoram hmasawnna atana pawimawh leh tih tul deuh nia hriat te sawiho a ni a. Media in engtin nge hma a lak ang tih te sawiho a ni bawk.

He inkawmnaah hian Kawlphetha siamchhuah, Kawngpui, Skill Development, Bank leh loan kaihhnawih, central welfare leh security scheme mipui nawlpuiin an hmelhriat theih dan tur te, leh thil pawimawh dang te sawiho a ni.

Governor nena inkawmnaah hian Print Media Publisher te lam atangin K. Sapdanga, Editor, Vanglaini ; C. Lalrambuatsaiha, Editor, The Aizawl Post ; Vanlalrema Vantawl, Editor, ZALEN ; Adam Halliday, Editor, The Frontier Despatch ; K. Zabiaka, Editor, Newslink leh M. K. Dey, The Mizoram Post te an tel a ni.