ZALEN May 5, 2025 : MNF Senior Vice President Dr. R. Lalthangliana chuan MNF sawrkarin Health Care an kalpui dan leh MUHCS chuangchang a sawi a, Health Care bill ba ZPM sawrkarin a pek tlak chu MNF sawrkar hnuaia ruahmanna awmsa hmanga pek a ni tih a sawi a, sawrkar chu a damdawiin kaltlanga Damlo inenkawlna bill lak tumah a puh bawk.

Vawiin Mizo Hnam Run chhung inkhawm hun hnihnaah thu a sawinaah Health Minister hlui chuan "Healthcare bill pekna tur Rs 60.00 Crores kum 2023-2024 khan Finance Department atangin allocation kan hmu a. MNF Sawrkar kal tain SEDP atan kan sum dah Rs 150.00 crores atanga Rs 40.00 crores chu Healthcare ba rulh nan an hmang a, tin hemi baka MNF sawrkarin Healthcare Bill pekna tur liau liau Finance Department-in fund allocation a lo pek sa diam Rs 60.00 crores atangin engemaw zat Healthcare bill ba chu an rulh theih phah ta zawk a ni. ZPM Sawrkarin Healthcare bill ba a pek zawng zawng te hi MNF Sawrkar in a lo ruahman sa leh dahsa sum atanga pek vek a ni," a ti.

MNF Vice President chuan, ZPM MUHCS System thar kalpui tura hma an rawn lak hian rawn awm ngawih ngawih a ngaih Private Hospital te leh Sawrkar hnathawk in zawmkhawm pawl (FMGE &W) te pawh rawn lo leh system fel hlel leh buarchuar takin Mizoram Universal HealthCare Scheme hi an tlangzarh a ni, a ti.

MUHCS chungchang sawiin, "MUHCS Scheme hi Package system a duan a ni a. He scheme hnuaiah hian Damlo ten an damlohna a zira package an lak ang chauh Damdawi In atang in an bill sak thei dawn a ni, a bak senso chu Damlo in a pek belh a ngai dawn a ni. Entirnan mi-in MUHCS empanel Damdawi In a rilphir lo zai tir ta se. MHUCS package ah chuan rilphir zai hi Rs 11,000.00 a lo ni a, he damlo hian he a rilphir zai nan hian he Damdawi In ah hian Rs 20,000.00 lo seng si se Rs 11,000.00 bak kha bill thei lovin a bak zawng hi dam lo khan a pek a ngai dawn a ni (MUHCS hi package a nih miau vang a ni). Rs 5,00,000.00 thleng damlo in a bill theih tih chu a ni dawn lo a ni," a ti.

Dr. Thangtea chuan, "MUHCS hnuaiah hian Mizoram sawrkar Hospital hrang hrang (Govt. Hospital) te hian damlo an enkawlte hnen atangin, Damlo inenkawlna an bill dawn tihna a ni a, chuvangin kan Govt. Hospital zawng zawng hi 'paying hospital' ah an siam dawn tihna a ni."

"Sawrkar Hospital-a damlo in enkawlna te Healthcare Bill atanga an re-imburse te hi enga hman tur nge, Damdawiin a thawk Doctor leh Staff zawng zawng te hlawh sawrkarin a pe bawk si." tiin ZPM sawrkar hian Mipui damlohna hi sum hmuh nan hman a lo tum reng tihna a lo ni mai lo maw? tiin zawhna a siam bawk.