Aizawl October 26, 2022 : Congress Thalai chuan Mizoram Chief Minister Zoramthanga'n October 25, 2022 (Thawhlehni)-a Champhai Grape Winery a tlawh tuma Grape wine hralhna chungchangah, "Project mumal tak siamin hma kan la ang," tih a la sawi chauh chu vanduaithlak an tih thu thuchhuah an siamah an tarlang.

MPYCC chuan, Kum 2007-a MIP pawisa hmanga bul lo tanpui tawhtu-in vawiina hmalakna mumal an la nei miah lo leh hmalakna thar tur a la sawi chauh mai chu Grape chingtute hmakhua tih tak takna nena an beihpui lohzia tilangtu a nih bakah, hmui chauha kut hnathawktute hmangaih thin tih buichhia laih lovin a in puang niin kan hria a ni, an ti.

Congress Thalai chuan May 27, 2022-a Champhai Winery siam Grape Wine zuartu Lalhriatpuii (L), a dawr Millenium Centre atanga Grape wine zawrh lai thahnem tak Excise & Narcotics Deptt ten Excise Minister thupeka an man sak chu pe kir leh turin sawrkar an ngen. Mizoram sawrkar chu Grape wine chungchangah kalphung mumal nei chuang lova Grape chingtute lehlamah fuih chung siin, lehlamah an siam chhuah (product) mansak leh si an nih avangin an dinna tichiang turin Congress Thalai chuan an ngen leh bawk a ni.