July 13, 2022; Mizoram Pradesh Youth Congress Committee (MPYCC) chuan May 27, 2022 a Millennium Centre a grape wine man neitu zinga mi, July ni 11, Thawhtannia thi ta Lalhriatpuii, Dawrpui Vengthar chhungte hnenah July ni 13, 2022, Nilaini chhun dar 12 hma ngei a zangnadawmna cheng nuai 100 pe turin Mizoram sawrkar an phut a, chumi bawhzui chuan vawiin chawhnu dar 1 vel atang khan Secretariat (MINECO) tualah congress thalaite pungkhawmin, sawrkarin zangnadawmna a pek hma chuan an hmalakna an chawlhsan dawn lo tih an sawi.

Vawiin an punkhawmna ah thusawiin, MPYCC president Dr. Lalmalsawma chuan, buaina siam tum an nih loh thu te, diklo taka sawrkarin a puhna vanga rilru hrehawm lutuk tuar, a nunna thleng a tawrh phah Pi Hriatpuii zahawmna humhim tura hmala an nih thu te a sawi.

Dr. Lalmalsawma chuan, "Nunna chu pawisa a teh chi a ni lo, a fate, a chhungte an la dam a, dan lo anga zu zuara puhtu hian ngaihdam a dil kan phut...dikna in kan ramah lalna a chan tawh loh zia kan hrechiang a, kan phut chu, minister hmuh a ni lo, zangnadawmna pek an tum em tih rawn en tura kal kan ni. A tawp thlengin kan kal dawn,"  a ti bawk.

Zangnadawmna an pek hma loh chuan an hmalakna an chawlhsan loh tur thu leh dan lo a zu zuar a an puhna pawh sawrkarin ngaihdam a dil an phut thu te sawi bawkin, rampum huap movement ang pawhin an chechhuaklo ang tih an sawi theih loh thu te a sawi.

Vawiin a congress thalaite punkhawmna hmunah hian police engemawzah an duty bawk a, boruak duhawmlo thleng a awm lo a, secretariat main gate tualah congress thalaite awmin, zangnadawmna chungchang a an dinna tichiang turin excise minister Dr. K. Beichhua an phut a, chumi tur chuan excise minister emaw a aiawh emaw chu an hmaa inlan turin an phut a ni.

Congress thalai hian excise minister Dr. K. Beichhuaa emaw, a private secretary tal lo chhuaka an thutlukna hriat phutin an nghak a, tlai dar 3:35-ah a PS lo chhuakin gate kiangah an inhmu a, minister dawhkana inbiak an duh thu an sawi a, mahse congress thalai hian thu phut an neih a hriat vek tawh avangin amah minister ngei lo chhuak turin an phut thung a, minister hi a lo chhuah mai loh avangin congress thalaite hi tlai dar 4 vel khan an tin a, an hmalak zel dan tur relin an thukhawm nghal nia thudawn a ni.