Aizawl October 25, 2022 : Vawiin zing khan Chief Minister Zoramthanga chuan Champhai Grape Winery, Tlangsam-a mi a tlawh. tumin Champhai Grape Grower Society-in nuai 83 chuang an hman chu an ngaidam tih a sawi a, Grape Wines Rules chu Political party te remtihna thlapa sign a nih thu a sawi. 

Chief Minister chuan thusawiin, "Grape chingtute hma ngaiin kan sawrkar hmasak aṭang tawh khan hma kan lo la tawh thin a. Harsatna siam zawng leh a tibuai zawng a kalpui hi kan duh lo a, an sum puk cheng nuai 83 chuang pawh rulh ngai loin kan lo inngaidam tawh a ni," a ti a. Chief Minister chuan Grape Wine Rules chungchang sawiin, "Mizoramin Grape kan tharte aṭanga siam chhuah Grape Wine hi dan ang thlapin kalpui a ni ta a. Political Party hrang hrangte remtihnaa hming sign thlapin Grape Wine Rules hi alo piang chhuak ta a ni," a ti. Wine rate tur hi ngaihtuah mek a ni.

Grape Wine Market chungchang sawiin Zoramthanga chuan, "Project mumal tak siamin hma kan la ang a, abul tantu ka nih angin a theih ang angin Delhi tlang thlengin hma la turin kan kal zel ang. A sawngbawlnaah leh market intervention chungchangah te, hmala turin Planning Department lam pawhin an buaipui thei ang," a ti a. CM chuan Grape leh sapthei chu a hringtute zingah tel vea a inhriat thu leh a tuina a nih thu a sawi bawk. 

He hun hi Grape Grower Society Chairman HS Vanlalfakzuala'n a kaihruai a, C.Malsawma'n tawngtaina hun neiin, Champhai Grape Grower Society Gen.Manager Hrilchunglura chuan report a pe a. Harsatna an tawhna karah sawrkarin grape wine rule an pass sak avanga lawmthu te a sawi. Grape chingtute grape thar cheng vaibelchhe 5 chuang man leisak tawh an nih thu leh MNF sawrkar hmasaah khan MIP pawisa cheng nuai 83 chu hman a nih dan te, rulh ngai lovin an ngaihdam sak tthu te a sawi a. Sawrkarin SEDP-ah pawh grape chin thlan theih tura a han siam te hi lawmawm an tih thu a sawi bawk a ni.