Aizawl; Mizoram sawrkarin a hnuaia thawkte zinga Group A leh B te a hun taka hlawh a pek theih hun tur chu sawi mai theih a la ni lo a, sawrkar sum dinhmun that dan azirin hlawh inpek hun hi tihdanglam theih reng a ni tih finance department hotute chuan ZALEN an hrilh.

ZALEN thudawnna Finance department hotute chuan group A leh B te hlawh pek tlai thin chungchangah Mizoram sawrkar sum dinhmun thlir reng a ni tih an sawi a, sawrkar sum dinhmun a that chuan hlawh an lak hun pangngaiah inpek theih reng a nih thu leh chumi hun thleng chu hlawh pek tlai tur tih a awm loh thu an sawi.

Federation of Mizoram Government Employees & Workers (FMGEW) chuan a hun taka hlawh pe thin turin January 7, 2022 khan Chief Minister Zoramthanga an lo ngen tawh a. Group A leh B-te hian hun eng emaw chen atang khan hlawh lak hun pangngaiah hlawh an la ngai tawh lo a ni.

FMGEW chuan January 7, 2022 khan CM Zoramthanga hnenah lehkha thehlutin, a hun taka hlawh pe thin turin an ngen a, “Sawrkar hnathawkte hi loan chi hrang hrang la kan ni hlawm a, hlawh kan lak tlai hian a hun takah loan kan rul thei thin lo a, penalty tam tak kan chawi tawh a ni. Chubakah, kan hlawh ringa khawsa ve tawk tawk kan nih hlawm avangin chungkaw khawsak nasa takin a buai thin. Chuvangin, kan hlawh hi a hun taka kan lâk \hin theih nan hma min laksak turin kan ngen nawn leh che
a ni,” an ti.
    Tuna kalphung hman mekah chuan Group C, D leh hnathawk dangte hlawh pek hmasak an ni a, chumi hnuah Group A leh B te pek thin an ni. December, 2021 thla hlawh pawh group A leh B hi January 17 atang khan pek a ni.