Aizawl June 13, 2023 : Young Mizo Association, Khawthlangtuipui Group te chuan May ni 3, 2023 khan an area chhunga Dan lova din khua (Unauthorized village), June 14, 2023 ral hma-a an parent village ah let leh tura an hriattir tawh, Tlabung Sub-Division, Lunglei District huamchhunga khaw 13 te chungchanga ngaihtuahin vawiin khan Lunglei Additional DC hovin meeting neih a ni. Heng khuaa hmasawnna hna leh scheme te lo kalpui lo turin department te hriattir an ni bawk.

Meeting kaihruaitu Lunglei Addl. DC Donny Lalruatsanga chuan Dan lova khaw din chungchang chu sawrkarin a ngaih pawimawh takzet thu saiin, kum 2019 khan Joint Inspection Team (JIT) din niin, inspection chipchiar tak neih a ni a, Covid-19 hrileng avangin hmalakna tih tawp lailawk anih thu a sawi a. Hemi kawnga hmalakna hi uluk leh fimkhur taka kalpui zel a ngaih thu leh mihring dikna chanvo (human rights) bawhchhe lo zawnga kalpui a tul thu a sawi a ni.

Meeting chuan SDO (C) Tlabung kaihhruaina hnuaiah official-te leh Khawthlangtuipui Group YMA hruaitu ten heng Unauthorized Village te hi July ni 15, 2023 ral hma ngeiin tlawh chhuak leh vekin, an dinhmun te zirchiang se a ti a. Department hrang hrangte chu Unauthorized village-ah te hmasawnna hna leh scheme te lo kalpui lo tura hriattir an ni bawk.

Tlabung Sub-Division, Lunglei District huamchhunga Dan lova khaw din (Unauthorized villages) te chu- Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nakuksora, Gurusora, New Balukiasury, Balukiasury- chhuah leh Bandiasora khua te an ni.

Meeting-ah hian Lunglei SP Rahul Alwal, DLAO Beitlotha Nohro, leh P&E, PHE, H&FW, RD, EF&CC, I&PR, leh School Education Department officials-te bakah Sub Hqrs YMA Lunglei, Lunglei District Village Council Association leh Khawthlangtuipui Group YMA hruaitute an tel a ni.