ZALEN July 6, 2025 : Taxation department-in kumin sawrkar kum, 2025-2026-a goods & services tax (GST) an khawn chu kum dang aiin an hmu tlem a. Sum hmuh a tlem chhan hi contract hnathawh a tlem vang niin taxation department thawktute chuan an sawi.



ZALEN-in Taxation Commissioner HK Lalhawngliana hnen atanga thu a dawn danin Mizoram GST hmuh chu contract hnathawhah a innghah avangin sum hmuh hi a tlem tih a sawi a. “Kan GST hmuh hi state dangte anga sumdawng hovah innghat lovin contract hnathawhah a innghat nasa a. Nikum lamah kha chuan contract hna lian pui pui thawh a tam a, chuta tanga an sum chhun luh kha a tam a. Kuminah erawh chuan khang hnathawh kha a tlem avangin kan hmu tlem ta a ni ber,” a ti. 

Taxation commissioner chuan GST atanga sum hmuh tlem chhanah hian sawrkar dem ngawt theih a ni lo tih sawi bawkin, “Nikum lama contract pek tawh hna la thawk mumal lote an awm a, chubakah hnathawk mek; mahse, bill la la lote an awm bawk a. Heng contract hnathawkte hian GST an chhun luh hunah chuan kan sum hmuh hi a la sang thei a ni,” tiin GST-ah sum lut tam lo mah se VAT lamah erawh chuan a lut tha niin a sawi a. Hei bakah hian contract hnathawk ni lo sumdawng atang chuan GST hi an hmu tha niin a sawi bawk.

Chhiah hmuh that nan Taxation department chu siamthat an tum tih sawiin Taxation Commissioner chuan, "Tuna Aizawla zonal office 4 awm hi siam danglam kan tum a. A hmaa zonal office ten engkim an buaipui thin ang kha ni tawh lovin zonal office 2 in registration leh administration an khawih tawh ang a. A dang zonal 2 a awm te kha wing 5-ah thenin policy & law, intelligence, enforcement, audit leh recovery an thawk tawh dawn a. Hemi atan hian sawrkar pawhin phalna min tawh a ni," a ti bawk. Kumin 2025-2026 a Taxation department sum hmuh tura ruahman (target) chu vaibelchhe 1370.50 a ni a, hei pawh hi harsatna dang a awm loh chuan tlin ngei an beisei tih Taxation Commissioner chuan ZALEN a hrilh bawk.

Hetih lai hian sawrkar laipuiin tun hnaia state hrang hrangte Goods and Services Tax khawn zat a tarlannaah Mizoram GST khawn chuan nikum a phak lo hle a, nikum June thlenga sum hmuh aiin kumina sum hmuh hi vbc.12 in a tlem zawk a. Sawrkar laipui chhinchhiah dan chuan nikum June leh kumin June thleng khaikhinin target tlin lo state 10 an awm a, hetih lai hian an target aia khawn tam zawk state 23 an awm thung. Sum hmu tlem ber zingah Mizoram hi a tel a ni.