October 30, 2022, Pathianni khan Morbi, Gujarat-a lei pakhat chu mi tam takin an zawh laiin a chim a, mi 100 chuang zet an thi. He thu buatsaih lai hian thi zat hi mi 141 an tling tawh a, mi eng emaw zat chin hriat lohin an la bo mek bawk. 
 
Machchhu lui chunga an lei dawh hi kum 100 dawna upa a ni tawh a, siam that a nih hnuah tun hnai khan hawn thar leh a ni. He pedestrian suspension bridge-ah hian sakhaw thilah mi eng emaw zat an pungkhawm a, hetih lai hian lei hi a chim zui ta a ni. Video atanga a lan dan chuan lei zawhtu thenkhat hian lei hi an sawi niin a lang a, thawk leh khatah a chim ta a ni. 

Lei zawhtute hi tuiah an tla lut a, mi 200 dawn chhanchhuah an ni. Lawng leh thil dang hmangin chhun zan zawmin chhanchhuah hna hi an thawk a, mi eng emaw zat an la bo. Hetih lai hian nunna chan zat hi pawh an la pun belh zel bawk. 

Prime Minister Narendra Modi chuan vanduaina thleng hi pawi a tih thu sawiin, November 1, Thawhlehni hian vanduaina thlenna hmun Morbi hi a tlawh dawn a ni. He vanduaina thleng hi IGP kaihhruainain chhui zui nghal a ni a, Navy, NDRF, Air Force leh Indian Army ten chhanchhuah hna an thawk mek zel bawk.