Aizawl; Sawrkarin Krismas leh Kumthar lawmna vuakveta halpuah leh halmawi zawrh, lei leh hal a khapna chuan zawm a hlawh lo hle a. Police te chuan sawrkar thupek zawm lote hi chhuiin thubuai an siamsak mek zel a, an hriat theihte chu umzui zel an tum thu an sawi bawk a, hriat theih chinah thubuai 21 ziahluh a ni tawh a ni.

Police hotute atanga thudawn danin nimin thleng khan halpuah leh a kaihhnawih zuar leh lei case 15 an ziaklut tawh a, halpuah leh a kaihhnawih hal case 6  ziahluh an ni tawh bawk. He thu ziah lai hian police lam chuan an la umzui zel thu an sawi bawk a ni.

ZALEN zawhna chhangin Police hotute chuan, "video kan nei tha a, kan la umzui mek avangin case kan siam zat tur awm ang hi a la hriat theih mai lo a. Kan bawhzui zel dawn a ni," an ti. 

Mizoram sawrkar leh Central YMA chuan hunpui Krismas leh Kumthar-ah te halpuah, halmawi leh silai lem, a mu kapchhuak theite hal lo tur leh zuar lo turin mipuite an ngen a. Police ten halpuah leh halmawi engemaw zat an man chungin kumthar lawmnaah Aizawl khawpui chhung veng hrang hrangah sawrkar leh YMA te ngenna zawm lo an thahnem hle a. Hetih lai hian halpuah hal erawh an tlem a, sky lantern hal pawh an tlem hle. "Kum dang ai chuan tun tum chu hal chi hrim hrim hal hi a zia zawkin kan ngai a ni," tiin police hotute chuan an sawi bawk.

Aizawl District Magistrate chuan halpuah, halmawi, sky lantern leh silai lem kawl leh zuar lo tura hriattirna a lo chhuah tawh a, hemi bawhzui hian police lam hian Hunpui vuakvetah hma an la a. 2021 kum tawp atang khan godown te nitin tlawhin courier service te pawh heng khap thil te phur lut lo turin hriattir an lo ni tawh a ni.