Phir unau inzawm te chuan an hnam tih danin zawmin an in chhuahsanin an pahnih pualin in an luah hrang ve tan ta. Keh thei dawm a dawmtu an chhungte lak atanga tla hrangin, hringnun zinkawng thar zawh turin zirlai phek an keu ve tan ta.
 
Kum 20 mi Brittany leh Abby te hian in hrang changin in bawl hrang tawh a, an inchawm zo dawn tih an chungten an hriat chuan an lungmuangin an hahdam ve huai ang chu. An pianphung a danglam em avang hian Brittany leh Abby te hian ngaihven an hlawhna a rei tawh bakah midang puihna pawh an dawng nasa hle a, mi tumruh tak an nih avangin an mahni pawh hian dam khawchhuak turin theihna sang tak an nei a ni. 

Zirtirtu chu 
An pahnih hian High school an graduate hnuah zirna sang zawk chhunzawmin education-ah college degree an nei leh a, tunah chuan zirtirtu ni turin thiamna leh theihna an nei ve tawh. Brittany leh Abby te hi Mounds View Public School-ah 5th grade zirtirtu hna an thawk mek a, zirlai naupangte tana chona leh phurna siamtu tha tak an ni mek. 

He phir inzawm te hian school-a an thawh dawn hian hlauhthawn ruk an nei a, an sikul naupang ten an pian dan mak danglam tak avang chuan an rap emaw an tih deuh an hlauh a, school tan thil duhawm loh an thlen palh an hlau a ni. Chutiang a thlen lohna tur chuan naupang ho thawng phut lo turin tih dan an ngaihtuah ta a, school an kal hma hian Brittany leh Abby te hian forum dinin naupang ho hnenah chuan an pianphung danglam tak chungchangah chuan an ngaihdan te an la hmasa ta phawt a. Vanneihthlak takin an remruatna chu kal fuhin pawl an lo din hmasa chu an tangkaipui ta hle mai. An harsatna tawh chu diriam leh hlau mai lovin naupang lam pawh chuan an lo ngaina phian a, an hna duh tak zirtirtu hna chu an thawk ve thei ta. 

An hnathawhna lamah an tuiin school thuneitute pawhin tha an ti hle a, an hnathawh leh zirtir dan an hmuhin school naupang nu leh pa-te lam pawh an lungawi hle a ni. Buaithlak ta chu, an pahnih hian mi hrang daih angin hna an thawk a, an diplom neihna pawh a hran ve ve niin subject hrang daih an la a, chuti chungin mipakhat hlawh bak pek an ni lo thung. Chutichung chuan an thil tawnah sawisel emaw vuina nei hran lovin nuam ti takin an thawk a ni. 

Chhungte puihna zar
An pianphung danglam hle mah se an chhungte hian an ringtawk em em a. Brittany leh Abby te hian dam khawchhuak turin hlawhtlinna an hmuh ngei an beisei tlat a ni. An nu leh pa, Patty leh Mike te hian anni pahnih enkawl nan hian hun leh tha tam tak an seng a, an mize in anglo lutuk pawh thiam leh dawhthei takin an enkawl thin a ni. Heng naupang pahnih te hian an chhungte atangin tawp chin neilo hmangaihna an dawng a ni ber mai.  

Hmuaktu thlamuan thlak loh
Phir unau te hian an nunah harsatna tam tak an paltlang tawh a, damdawi lam thiamna hrang hrang hmanga enkawlna lo dawng tawh thin an ni a, An hma hunah eng thilin eng nge hmuak tih lah an hre der bawk si lo. Hetiang phir inzawm te hi, a tlangpuiin an dam rei lo thin bawk nen nun thlamuang taka hman chu a harsa ve viau maithei. Tunah rih chuan Brittany leh Abby te hian an hriselna thuah harsatna leh insawisel em em an nei hran lo a, hrisel leh hlim takin hun an hmang mek a ni. Zai neuh neuh chu an tawk ve zauh zauh tawh chungin doctor te chuan lung natna an neih mai an hlauhpui em em a ni. 

Hma hun thlirin 
An hringnunah thil buaithlak tak dang pakhat a la awm leh a, chu thil chu Brittany leh Abby te hian an hma hunah pasal neih a chhungkaw din an duh ve ve hi a ni. An duhzawng leh hmeltha tih zawng a lo dang ve leh zel nen a buaithlak hle a, mahse an nih dan anga hmangaiha pawm thei tur mipa pahnih an tawn ngei an beisei tlat thung.