Haulawng khawthlang chuan an bialtu MLA-in an party mite tan an field laihna tur sum awm sa chu an party mite hnathawhna atan a pawh pensak niin an puh.

Pathiannia Field Management Committee (FMC), Haulawngin thuchhuah an siamah bialtu MLA-in chet dan nia an sawi hi an tar lang a. “Hnathawktute (party worker) kan lawmpui rualin khawtlang mipuite rualawhna ber, khelmual puitling nei tura hun rei tak hmalakna kal tawh tihthuanawp a ni ta mai hi a pawi kan ti,” an ti.

“Inhrilhhriatna leh sawihona awm hauh lo leh mahni mi mal hmakhua ringawt thlir avanga khawtlang hmathlir pawhpen mai duh bialtu MLA leh party worker kan nei hi a pawi kan ti tak meuh meuh,” an ti bawk.

FMC, Haulawng thuchhuaha tar lan a nih dan chuan khelmual puitling (football ground) an mamawhna avangin April 15, 2021 daih tawh khan Village Council, Haulawng kaihhruaiin committee an din a. Committee-ah hian VC-te bakah MUP, YMA, MHIP leh GSA (H) te telin hruaitu tur pawh a tel pawl atang hian an inthlang thin.

Khelmual laih hna hi bialtu MLA hian a thawhsak tur thu sawiin, a hmun tur ngaihtuah turin a ti niin an tar lang a. Field hmun tur hi eng emaw chen an ngaihtuah hnuah an khuaa Primary Health Centre bula mi mal ram chu lei turin an inbe fel tih an sawi.

May 31, 2023 zan khan MLA hian a hmun tur an neih leh neih loh tichiang tur leh zan dar 9:00 thleng a ngaihchan tur thu a hrilh niin FMC chuan an sawi a; a hmun a fel thei lo a nih chuan a laihna tur sum chu hmun danga hman (divert) mai a duh tawh thu a hriattir bawk niin an sawi a, hei vang hian hmanhmawh takin an thukhawm nghal tih an sawi.

Bialtu MLA hnenah hian hna tan mai an inpeih thu an hril zui ve nghal bawk niin an insawi a, “Field lai mai tura beiseina kan neih lai leh nghakhlel taka kan thlir mek laiin sum ruahman sa chu party worker-te inhlawh nan (futsal ground siam nan leh Zokuma Memorial Field-a pavillion hnuai chei nan) pawh pena sem ral a ni tih kan hre chawp ta mai a ni,” an ti.

FMC-in thuchhuah an siamah bialtu MLA hming hi an tar lang lo va; mahse, Haulawng hi Lunglei North assembly constituency-a awm niin bialtu chu Dr. Vanlaltanpui a ni.
 
FMC hian tunah field laihna tur sum nei mai rih lo mah se a theih ang anga hmalak chhunzawm zel an tum tih an thuchhuahah hian an tar lang bawk.