Aizawl: Mimal enkawl damdawi in ten health care rate thar siam an pawm loh chung changah sawrkar chuan tawlh a tum lo a. Mipui ten harsatna an tawh loh nan sawrkar damdawi in ah khum dah belh a, hnathawk chawl mek te pawh koh let a tum bawk.

Nimin chhun khan Health Secretary H.Lalengmawia chuan Civil Hospital Medical Superintendent room-ah press mite kawmin Mizoram State Health Care Society rate chu pawm turin private damdawi in te a ngen tih sawiin tuna rate an siam chu private damdawi in te nen vawi tam tak an sawi ho hnu leh an remtih anga siam a ni tih a sawi a.

“Tun atan chuan rate thar hi pawm phawt turin kan ngen a, pawr leh mam lo lai a awm chuan la siamthat zel theih a ni a. Heti chunga private damdawi in ten an zawm thei lo hi a vanduaithlak a, damlo hmangaih anga an in sawi hi a mak hle a ni," a ti.

Health Secretary chuan private damdawi in thenkhat MHCS pawm lo te tan sawrkar-ah bill a remchang tawh dawn lo tih sawiin hemi avanga damlo ten sawrkar damdawi in an pan tam tak thulhah ruahmanna hrang hrang siam a ni tih a sawi a. “Sawrkar damdawiin-ah khum dahbelh kan tum a, corridor ah pawh a tul chuan khum dah kan tum bawk a. Urban health Centre leh PHC ah te pawh a theih ang anga damlo admit turin kan ti a. Health department thawk, chawlh la mek te pawh damlohna thil tih loh chu koh let vek kan tum a ni,” a ti bawk. Health Secretary chuan Zoram Medical College, Falkawn thawk te pawh a tul anga hmun danga thawh tir an tum tih sawiin ZMC pantu an tam thulhah tuna bus service mek 6 bakah MST bus 3 dang service tir an tum niin a sawi bawk.

Sawrkar ruahmanna dang sawiin Health Secretary chuan private damdawi in ten Civil Hospital atanga thisen an lak thin pawh Director, Hospital & Medical Education remtih-na lo chuan tihtawp a ni rih dawn tih a sawi a. Bio Medical Waste Rules pawh khauh taka kenkawh tum a ni tiin a tul angin enfiah thin a ni dawn niin a sawi a.

April 2020 atanga Clinical Establishment Act hman tura tih chu January ni 17, 2020 atanga hman tan tum a ni tiin, “He dan hi hman anih chuan sawrkar Doctor te private damdawi in ah an thawh a rem tawh dawn lo a, sawrkar ah registration an dil a ngaih dawn avangin hospital kalpui a har tawh dawn a ni,” a ti bawk.