Aizawl: Mizoram sawrkarin October ni 1,2019 atanga a kalpui tur Health Care Scheme thar atana inziahluhna chu tunlai hian hmun hrang hrangah kalpui mek a ni a, Mizo damlo te pan hlawh tak Kolkata damdawiin te chuan AB-PMJAY an hman ve loh avangin hman theih a ni dawn lo.

Sawrkarin October ni 1,2019 atanga Health Care Scheme thar a hman dawn tak avang hian a thar vekin inziahluh a ngai a, hun hmasa lama inziahluh kha pawm a ni tawh dawn lo a ni. Sawrkar laipui, Ministry of Health & Family Welfare in October ni 1,2019 atanga a kalpui tur Health Care Scheme thar Ayushman Bharat- Pradhan Mantri Jan Arogya Yojana (AB-PMJAY) ah hian Rural Development Ministry hnuaia Socio Economic Caste Census (SECC) 2011 a tel chhungkua (khawsak harsa leh hnuaihnung) bakah kum 2018 a RSBY hnuaia thlalaa smart card neite tan chuan inziahluh a ngai lo a. He list a tel lo te chu a thara in ziahluh vek a ngai a ni.

SECC hnuaiah hian chhungkaw 1,01,880 awmin RSBY hnuaiah hian chhungkaw 1,65,727 an awm mek a, list a telkawp an tam avangin Mizoram State Health Care Society chuan hemi pahniha mite hi chhungkaw 1,90,000 velah an ngai tih Zalen palai an hrilh bawk.

MSHCS thawktute sawi danin Health Care Scheme thar a inziaklut tur te chuan chhungkaw hotu ber Voters ID Card leh mahni chhungkaw hming tarlanna Ration Card te ken tur a ni.

BPL chhungkua tan inziahluh man hi Rs. 100 (cheng za) a ni a, APL chhungkua te tan Rs. 1000 (sang khat) a ni bawk a. BPL chhungkua te hian damlohna an tawhin Rs. 2,00,000 (nuai hnih) thleng an bill let thei a, APL chhungkua hian Rs. 5,00,000 (nuai nga) thleng an senso hi an bill let thei dawn bawk a ni.