ZALEN June 30, 2025: Health & Family Welfare Minister Lalrinpuii chuan vawiin khan Aizawl khawpui chhunga Private Hospital hrang hrang, Mizoram Universal Health Care Scheme (MUHCS) zawm thar - Kidney 360° Superspeciality Clinic & Dialysis Centre, Bazar Bungkawn; Nazareth Hospital, Chaltlang; Nazareth Hospital, Ramhlun leh Redeem Hospital, College Vengte a tlawh. 

Rinpuii chuan mipui hmakhua ngaia private hospital pathum leh Kidney 360° ten mipuite mamawhna hriaa hmangaihna leh rawngbawlna rilru pu chunga ke an rawn pen chhuak a, MUHCS an zawm chu lawmawm a tih thu leh MUHCS zawm remchang ve rih lo te pawh sawrkar chuan a nghah reng thu leh engtiklai pawha sawrkar a inhawn reng thu a sawi.

Health Minister Lalrinpuii chuan mipuite pawhin MUHCS zawmtu hospital-te sum pe lova (Cashless) inenkawl tura an pan zui zel a beisei thu a sawi a. Mipuite tana scheme tha tak mai chhawpchhuak thei tura thawktute leh sawrkar inpekna chu fakawm a tih thu a sawi a. 

Lalrinpuii chuan Pensioner pangngaiin a huam loh, Central Scheme hnuaia hlawh la thawktu hrang hrangte pawhin zawm an rawn dil thu tarlangin, Sawrkar chuan a tlin tawk ang zelin dilna lutte a ngaihtuah thin tih a sawi bawk.

Tunhnaia MUHCS zawmtu thar Kidney 360° Superspeciality Clinic & Dialysis Centre-ah hian Dialysis khum 6 a awm a, damlo 595 chu MUHCS hnuaiah cashless-in an enkawl tawh a, dialysis mamawh an tam avangin booking tih lawk a ngai.

Nazareth Hospital leh Redeem Hospital-ah te pawh General ward, Semi-cabin leh Private cabin thianghlim leh changtlung tak a awm a, heng hospital-ahte hian MUHCS-a inziaklut tawhte tan cashless in a inenkawl theih a ni.

Tun dinhmunah hian MUHCS hnuaia inziaklut tawh (beneficiaries) awm zat chu ABPMJAY 2,19,002, Mipui (Contributory Beneficiaries) 9069, Pensioner 9310 leh Sawrkar hnathawk 55470, a vaiin 2,92,851 an awm tling tawh a ni. 

Hospital-te hnenah hian kartin bill pek chhuah thin a ni a, June ni 24, 2025 thleng khan mi 12,917 hnenah bill Rs 15,12,17,890/- (crore 15.12) pek chhuah tawh a ni.