Aizawl: Health department chuan Zirtawpni khan Zokhawsanga Assam Rifles hmunah Army leh Para-military ten Covid Care Centre an buatsaih theih dan tur an zirtir.

Training- ah hian Indian Army, Assam Rifles, BSF leh BRTF mi leh sate telin Dr. Pachuau Lalmalsawma, State Nodal Officer for COVID-19 leh Dr. PC Lalramenga, Head of Medicine Department, ZMC bakah State IDSP atangin Lalfakzuala Pautu leh Yogesh Malvi, Microbiologist ten training an pe a ni.

Tun hnaiah Army leh Para-military mi leh sa te zingah COVID-19 inkaina a hluar chhoh avangin nasa taka tan lak a ngaih thu te, Covid Care Centre kalphung fel leh khauh zawka invawn a tul thu sawiin Dr. Pachuau Lalmalsawma chuan civil mite entawn tlak (model) ni turin kalkhawmte chu a fuih a ni.

Trainingah hian COVID-19 sample lak leh thawn chungchang te, CCC leh Quarantine centre uluk taka kalpui dan tur te, COVID-19 positive-te enkawlna leh chhuah dan tur bakah hmanrua leh thawmhnaw hman tawh sawngbawl dan te zirtir an ni.

Mizoram sawrkarin training pawi -mawh tak a buatsaih sak avangin Health & Family Welfare Minister hnenah zirtirna dawngtute hian lawmthu an sawi.