Aizawl : Health Minister Dr. R. Lalthangliana chuan Zirtawpni khan Civil Hospital Aizawl a tlawh a, Minister hi Health & Family Welfare Board Vice-Chairman Dr. ZR Thiamsanga leh Health department hotuten an tawiawm a ni.

Health Minister chuan Civil Hospital-a Medicine ICU khum 10 awmna tur sak mek, Makeshift ICU khum 10 awmna tur leh Naupang damlo na zual enkawlna tur Pediatric ICU, khum 5 awmna tur sak mekte a tlawh a, heng bakah hian Operation Theatre tlawhin, Civil Hospital building hlui deuh ho dinhmun a enfiah bawk a, Trauma Centre sakna tur hmun a enfiah bawk.

Health Minister chuan, "COVID-19 hripui leng vanga tum angin thil engmah a kal tluan thei lo a, Zoram Medical College (ZMC) chu COVID-19 veite chauh enkawlna tur (Dedicated COVID Hospital) atana puan a nih tak avangin ZMC-a damlo enkawl laite pawh Civil Hospital Aizawl -ah lak phei an ni a, COVID-19 ni lo natna hrang hrang vanga harsatna tawk tam tak an awm bawk nen Civil Hospital Aizawl lam pawh an hah hle a, an inpekna a fakawm a ni," a ti a. ICU hrang hrang a en te hi civil works zawh fel tep a ni tawh a, khawl mamawhte pawh a awm deuh vek tawh a, ICU a thawk tur mi thahnem tak lak an ngai dawn a, ICU te hi rang taka hman theih tura buatsaih a tul a tih thu a sawi. Aizawl Civil hospital-a thawktu ten an mamawh chi hrang hrang an lo thlente chu a theih ang anga ngaihtuah a nih tur thu a sawi bawk.

Minister tawiawmtu Health & Family Welfare Board Vice-Chairman Dr. ZR Thiamsanga pawhin Civil Hospital Aizawl-a ICU khum 20 chuang zet mai peihfel a ni mai tur chu lawm awm a tih thu a sawi a, thingtlang lam mi damlo serious tak takte pawhin private hospital pan ngai lovin Civil Hospital Aizawl ah enkawlna tha tak an dawn theih phah tawh dawn a, amaherawhchu a thawktu tur lak belh a ngaih dawn avangin sawrkar pawhin hei hi ngaih pawimawh hmasak-ah a neih tul a tih thu a sawi ve bawk.