Aizawl: Health & Family Welfare Minister Dr. R. Lalthangliana chuan Zirtawpni khan khum 50 awm theihna tur District Hospital Lawngtlai building thar a hawng.

Hospital building thar hawnna puala Chief Medical Officer Conference Hall-a inkhawm tawi buatsaihah Health Minister chuan COVID-19 dona kawngah Ministry of Health & Family Welfare-in Mizoram chu India rama state leh UT zawng zawng zinga hma la tha ber (best performing state)-ah a puang tih sawiin, a chhan bulpui ber chu chung lam hna thawh a ni a, chu bakah a hmanrua sawrkar, tlawmngai pawl, kohhran leh mipuite tan rualna rah a ni tih a sawi.

Health Minister chuan COVID-19 vanga airport screening, ramri duty leh lockdown te kalpui hmasa ber state kan nih thu sawiin, a tirah a test-na khawl leh a dahna hmun tur pawh awm lo chungin, kawng dap chawpin tun hi kan thleng, a ti a. Zoram Medical College (ZMC)-a RT-PCR khawl chhawk zangkhai nan district 10-ah Mini PCR TrueNAT Quattro khawl bun tura hma lak a nih thu leh tun thla chhung chuan hman kim theih beisei a nih thu sawiin, darkar khat chhunga a result hriat nghal theih leh ni khata sample 40/50 test theihna a nih bakah, COVID-19 kian hnuah pawh natna chi hrang hrang chi 16 enfiah nan hman zui theih a ni dawn a, COVID-19 kara malsawmna tia sawi theih a nih thu a sawi bawk.

He huna khual zahawm, Agriculture Development Board Vice Chairman H. Biakzaua chuan District Hospital building thar sak a nih chungchangah sawrkar hotute leh health department chungah lawm thu a sawi.

Building thar hawnna inkhawm hi Health & Family Welfare Department Secretary H.Lalengmawia, IAS chuan kaihruaiin, PWD (Building) Superintending Engineer Er. Lalruatkima'n building an sak chungchanga technical report a pe a. Hospital & Medical Education Director Dr. T. Lalhmangaihi'n lawm thu sawiin hun khar a ni.

Building thar hi IPD (In-patient Department) building block 1, Type-II Quarters block 2 (unit 12), Type-III Quarters block 2 (unit 12) leh Type-IV Quarters block 1 (unit 3) te a ni a. Tuna District Hospital Lawngtlai building luah lai mek hi OPD (Out-patient Department) building niin, tun dinhmunah khum 34 a awm mek a, building thar luah luh a nih hunah chuan khum 50 a awm thei tawh dawn a ni.

50-Bedded District Hospital Lawngtlai sak hna hi Non Lapsable Central Pool of Resources (NLCPR) sum hmanga thawh niin, Mizoram PWD (Building)-in an enkawl a. Rs nuai 1188.75 sanction niin, ni 07.12.2016 khan sak tan a ni a, ni 31.01.2020 khan zawh a ni. IPD building hi a chhawng (floor 2) niin, ground floor (845.25 Sqm)-ah hian Gynaecology Ward, Paediatric Ward, Male Medical Ward, Female Medical Ward, Committee Room, Staff Room, Medical Superintendent Room, etc. a awm dawn a; first floor (360.29 Sqm)-ah hian Male Surgical Ward leh Female Surgical Ward, etc. a awm thung dawn a ni.

Hospital building thar a hawn zawhah Minister hian ANM School, Govt Lawngtlai College leh District Industries Centre te a tlawh nghal bawk.