Aizawl August 4, 2022 : MPCC Gen. Secretary Lalrindika Ralte, MLA chuan Mizoram sawrkarin Buhfai a leina chu to a tih thu leh hei aia hloh tlem zawk hian sawrkar hian hma la se a duh thu a sawi a, hei aia tlawm zawk hian a lei theih a ni tih ka hriat thu leh buhfai lei leh a chhehvela pawisa kal ral chu tih tawp vat tul a tih thu a sawi bawk.

Lalrindika Ralte chuan, "Sawrkarin Supply Department kaltlanga open market-a buhfai a leina man hi sawrkarin a bithliah a, ZIDCO kaltlangin lei thin. Heti chung hian sawrkar chuan buhfai lei nan hian sum tam tak a la hloh reng a. Buhfai quintal 1 hi Rs 2750/- in a lei a, quintal 1 Rs.1500/- in a hralh leh a. Quintal 1 zela sawrkar sum hloh hi Rs.1250/- a ni," a ti.

MPCC Gen. Secretary chuan, "Sawrkarin buhfai a leina man hi a sang hle a. Hei aia tlawm zawk hian a lei theih a ni tih ka hria a. Hetianga buhfai kan leina leh a chhehvela pawisa tam tak luangral hi kan ram sum leh pai indaihlohna thlentu pakhat a ni a. Chuvangin, ram sum leh pai dinhmun siamthat nan leh kan sum hloh a tlem zawk theih nan buhfai kan lei leh a chhehvela pawisa kal ral hi kan tih tawp vat a tul hlein ka hria," a ti. 

Hachhek bialtu chuan, "Buhfai leina man bithliahtu hi sawrkar a ni chunga manto taka sawrkarin buhfai a lei hi tul lo a, mipui sum tamtak khawhralna a ni. Tu ten emaw lo hlawkpui viau mah se, Ram sum dinhmun harsat zia ngaihtuaha man tlawm zawka lei ngei turin Mizoram sorkar ka ngen a ni," a ti bawk.

Kumin January 2022 atanga June 2022 (Thla 6 chhung) a ZIDCO kaltlanga Mizoram sawrkarin Buhfai a lei tawh zat chu Quintal Nuai 2 Sing 9 Sang 5 (2,95,000) a ni a, a lei na’n cheng Vaibelchhe 81 leh Nuai 12 leh Sing 5 (Rs. 81,12,50,000/-) sen a ni. Heta sawrkarin sum a hloh zat chu cheng Vaibelchhe 36, Nuai 87 leh Sing 5 (Rs.36,87,50,000/-) tihna a  ni. Thla tina sorkar sum hloh chu cheng Vaibelchhe 6, Nuai 14, Sing 5 Sang 8 Zathum Sawm Thum Pathum (Rs. 6,14,58,333/-) a ni. Kum khat chhunga sawrkar sum hloh zat chu Cheng Vaibelchhe 73 nuai 75 (Rs. 73,75,00,000/-) vel a ni.