ZALEN January 25, 2026: Laos jail-a tang mek, Mission Veng, Aizawl nula, Ellen Lalthlamuani (40) d/o Lalchawimawii chu ukil hmanga biakpawh tum ni mah se la biakpawh theih a ni hrih lo.

Ellen-i hi November 18, 2025 khan Vietnam atanga Singapore pan tum anga hriat a ni a, hemi hnu hian India rama let leh tum niin an sawi.

November 18, 2025 zing dar 7:30 vel khan a nu leh a u biak a tum a; mahse, phone call an la lo a. A nute hian an hriat veleh biak let an tum a, an be tlang thei tawh bik lo a ni. 

He thil thleng chungchangah hian thuneitute biakpawh nghal niin Mizo Diaspora Cell chuan hma lain Ministry of External Affairs-ah tanpui tura ngen a ni a. Vietnam chhuahsan tur anga hriat a nih avangin sawrkar thuneitute chuan Vietnam-ah hian eng emaw chen an zawng a; mahse, hmuh a ni lo a. Diasporal Cell hian a theih ang anga chhui zui zelin Laos-ah a awm tih an hre ta a ni.

ZALEN-in Mizoram police hotute hnen atanga thu a dawn danin Ellen-i hi eng emaw chen zawn a nih hnuah Laos-ah hian hmuh a ni a, heroin vanga man a ni a; mahse, heroin a ken zat chiah hi sawrkar lam chuan an la hre lo.

Ellen-i hi jail-ah tantir niin ukil hmanga biakpawh leh a chanchin hriat tumin hmalak mek a ni.