Aizawl : Mipui himna aia party hamthatna ngaipawimawh zawktu MNF vote loh tur leh hrileng laka inveng fimkhur tak chungin thahnemngai taka mipuite vote thlak turin Congress Media cell te chuan mipui an ngen.

Nimina Congress thuchhuah chuan Covid-19 hri leng avangin Aizawl bakah thingtlang khaw thenkhatah Lockdown a ngaih hial laia inthlan an sawn duh lo chu an hriatthiam theih loh thu an an tarlang. MNF sorkar chu mipui himna aia an party hamthatna tur ngai pawimawh zawkah an puh a. Village Council leh Local Council inthlan lo awm turah hian vote thlak tur zawng zawngten mipui himnana aia an party hamthatna dah hmasatu MNF sorkar thil tih dan kan duh loh zia lantir nan an candidate-te vote lo turin mipui an ngen a. Chutihrualin hrileng laka inveng fimkhur tak chunga thahnemngai taka vote thlak turin mipui an ngen thu an tarlang a.

Inthlan hmachhawn tura an inpeih thu leh hmun hrang hrangah candidate an nei tha niin an in sawi a, MNF chu ram leh hnam phatsantua an ngaih thu an tarlang bawk.