Aizawl : Hindu leh Muslim ten Ayodhya-a ram an inchuhna kal zelah Chief Justice Ranjan Gogoi kaihhruai judge panga awmna Supreme Court Constitutional Bench chuan thutlukna siamin Hindu te kutah he hmun hi awm turin thutlukna a siam. Ayodha-a Ram temple leh Babri Masjid buainaa thutlukna a siam hnuah social media lamah thu dik tawk lo nasa taka thehdarh a ni zui nghal a, he an thu thehdarh hi vawiin Pathianni atanga hman tan tur niin tarlan a ni nghe nghe.
He dan an hman tur, 'Government new rule of communication' tia an thehdarha an tarlan ang chuan, Ayodhya leh a chhevela phone leh social media dan thar an hman dan tura an thehdarh hian ngaihven a hlawh hle. Heng an thu thehdarh-ah hian point 12 zet tarlan a ni a, social media lamah sawiselna pawh a tam nghal hle, mahse, media lian ten an chhui chian hnuah phuahchawp leh dawt a nih thu hriat nghal a ni.
SC hian Ayodhya huamchhunga ram acre 2.77 a zau hi Hindu te hnenah a hlan a, an tan Ram temple sakna tur kawng thui tak a hawnsak a, Muslim lam hian a bul lawka ram acre nga a zau chu an chang ve thung dawn a ni. Judge panga awmna Chief Justice Ranjan Gogoi a kaihruai hian helai ram hi Hindu te kuta a hlan rualin central sorkar chu he hmuna temple sakna tura mawhphur tur siam turin a ti nghal.
He thutlukna siam a nih kawngah Supreme Court chuan thutlukna engemaw zat neiin Court hian Hindu te hi chhan neiin a hlan. Ram acre 2.77 a zau hi mawhphur tur te hnenah a hlan ang a, hei hi thla thum chhungin ruat fel tur a ni. He temple sak hna hi an mi thlan te hian an enkawl ang. Sorkar laipui hian mawhphur tur boarcd hi thla thum chhungin a ruat fel tur a ni.
Muslim lam hian an Mosque sakna tur ram hi an nei ve nghal ang. Court hian he hmuna Muslim ten hmun an neihna chhan tur tan chhan an nei lo tiin thutlukna an siam a, a hnung lam hmun lah Hindu ho ram ngawih ngawih a ni bawk si a ni.
Supreme Court chuan Allahabad High Court thutlukna chu a dik loh thu sawiin, pawl pathum -Ram Lalla Virajman, Nirmohi Akhara leh Sunni Waqf Board te kuta hlan chu thil dik lo a ni tiin, helai hmun hi then hran chi a ni lo, an ti.
He ram chhinchhiah a nih dan hi judge pangnga awmna CJI Gogoi a kaihruai CJI-designate SA Bobde, DY Chandrachud, Ashok Bhushan leh S Abdul Nazeer te tel bawkna hian chiang takin an hrilhfiah.
November 17 a chawl tawh mai tur Chief Justice of India Ranjan Gogoi leh judge pali dangte hian hemi chungchang hi ni 40 chhung ni tin an ngaihtuah a, India ram rorelna sang bera thu ngaihtuah rei ber a ni.
Article 142 tlawhchhanin SC hian an thil kalpui turah Nirmohi Akhara chuan aiawh an neih theih tur thu a sawi. He case a hming langsar tak zinga mi, Akhara suit chu bench hian a lo hnawl tawh thung. Supreme Court chuan Nirmohi Akhara hi helai hmun enkawltu an nihna pawh a hnawlsak.
Judge panga awmna bench hian Shia Waqf Board rawtna siam chu an hnawl bawk.
Supreme Court hian 2003 Archaeology Survey of India chu hnawl vek theih a ni lo an ti a, he hmuna Idgah hi a lo awm ngei em tih chianna atan a tangkai niin a sawi. “Babri mosque hi hmun ruakah sak a ni lo. Engemaw lo din tawhna tih a chiang,” an ti.
Court chuan, “He hmun hnuaia thil ruangam awm chu Islamic sakhua nen inzawmna a nei lo,” a ti. Hindu-te hian Ayodhya hi Lord Ram a pianna niin an ngai. An rin dan leh ngaihdanah chuan tuna mosque awmna hnuaia pindan pakhat hi Lord Ram-a piannaah an ngai. Court lam chuan, “Lord Ram hi Ayodhya-ah hian a piang ngei tih chu pawm theih a ni lo,” an tihsak thung.

Social media sorkar thuchhuan nia thuthang
Phone hman reng reng chu record vek a ni dawn
Heng call an record te hi save vek tur a ni.

Whatsapp, Facebook, Twitter leh all social media reng reng thlithlai reng a ni ang.

Heng thil la hre lo te chu hrilh hriat zel tur.

Kan khawl hman reng reng sorkar laipui system nen thlunzawm vek a ni.

Tu hnenah mah message dik lo thawn loh tur.

Kan chhungkhat laina leh thiante chu social media hmang tam lo turin hrilhhriat hram tum tur.

Social media a post leh video reng reng, tuna court thutlukna hawi zawnga sawrkar leh PM sawiselna awm te chu mi dang hnenah thawn chhawn loh tur.