Aizawl June 25, 2024 : Hlimen-a Khuarel chhiatna avanga harsatna tuarte chenna tur Relief Camp chu Hlimen-a Transport hmun, Central Workshop ram chhungah sak mek a ni a, a tahtawlin a awm tur te an lut a, chhungkaw 68 te tana Relief camp sakah hian chhungkaw 10 awmna tur bak an sa thei rih lo.

Relief Camp hi June 10, 2024 (Thawhtanni) atang khan hna thawh tan a ni a, He In hi a dung feet 192 leh a vang feet 12 a ni a, inthiarna hi 7 siam niin, inbualna tur 3 ruahman a ni.

Relief Camp sak mekah hian sawrkar lam atanga beisei ang sum an hmuh leh theih loh avangin, pawisa hi a remchang ang angin an pawt chawp a, chu chuan harsatna a siam bakah, chhunzawm zelna turah rorel a tiharsa deuh niin hriat a ni a, chuvangin khawtlang mipuite thilpek lamah tan la turin an inngen nawn a ni.

Ni 23. 6. 2024 Pathianni-ah khan relief camp-ah hian Chhungkaw 4 an lût a, Thawhtanni-ah Chhungkaw 2, vawiin khan chhungkaw 2 an lût leh niin ZALEN chuan thu a dawng a, tunah rih hi chuan relief camp-ah hian Chhungkaw 10 bak chenna tur a la awm thei lo thung. June 24-ah Hlimen aiawha Home Minister K. Sapdanga hmu te chu Cheng Nuaih 10 pek an ni a. He camp sak nan hian nuai 8 vel an seng tawh a, sak belh zel a la ngai dawn tih an sawi.

June 3, 2024 khan Aizawl DC Order chhuah angin Hlimen Quarry piah phei leiminna bawr-a In ding 46, chhungkua 68 vel chu thu leh awm hma chu an in chhuah san tur a tih an ni.

June 4, 2024-a Home Minister K Sapdanga hova joint meeting neih chuan In chhuah san ho tan planning Estimate siam turin a ti a, Local Council leh YMA ten joint meeting thurel angin mi 7 estimate siam tur hian an ruat a, anni hian Rs 44,28,512 an ruahman. Estimate an siam hi pawm a ni lo a, Sum indaih lohna avangin Rs. 6,00,000/- bak sunction theih a ni lo tih hrilh an ni tih thu dawn a ni.

Relief Camp sakna atana Central Workshop an beisei chu Transport Director in a tirah a phâl lo, An dilnawn leh pawhin a phal lo a, Joint Committee chuan Chief Minister Lalduhawma hnêna an harsatna thu an thlen leh hnuah Workshop hmun ah hian relief camp hi sak a ni.