ZALEN March 25, 2025; Kulikawn Vengthlang Branch YMA in ruihhlo kaihhnawih a kut inthlakna thlengah FIR an thehlut a, police in pawikhawihtute zinga mi thenkhat an man tawh.

Kulikawn Vengthlang Branch YMA in thuchhuah an siama an tarlan danin, March ni 22, 2025 a CYMA in 'ruihhlo do hnatlang' neia branch YMA tinte hmala tura a hriattir bawhzuina ah, an huam chhungah mi pakhat chu damdawi a zawrhlai nen man a ni a. 

An YMA member pakhat chu a hektuah puhin, a tuk March ni 23 chawhma dar 11 bawr velah bolero, bike leh scooter hmanga hmaituam rual kal ten, an member hektua an puh hi an in atanga ko chhuakin an in piah lawkah kut an thlak rawn a, inkhawm bangin an hmuh avangin chung mite chu an in saseng a ni.

Chhun pachang lai ngeia ruahmanna fel tak nei, pawikhawih tum sa ran, bolero registration plate pawh pawnchhia a khuh thlapin, baseball bat leh hmanraw dangte kenga hetianga vengdang mi, an vengchhunga an che hi an dem takzet a ni.

March ni 23 zan khan Kulikawn PS-ah thubuai thehluh nghal a ni a, police te hian pawi khawihtute zinga mi thenkhat chu a zan la la hian an man nghal bawk.

Heng hmaituam rual, pawi khawihtute hi man kim vek a, an phu tawk hremna pe ngei turin thuneitute an ngen a, hetiang thil hi thleng tawh lo se an duh tih an thuchhuah-ah chuan an tarlang.